Me Christensen dhe Rüdiger që janë në përfundim të kontratës së tyre, Chelsea i Thomas Tuchel duhet të ndërmarrë patjetër përforcime në mbrojtje. Londinezët kanë një sërë alternativash në mendje, por së fundmi, ka qarkulluar dhe emri i brazilianit të Real Madrid, Eder Militao.
Konsolidimi i Militao në mbrojtjen e Real Madrid, por dhe atë të kombëtares braziliane, nuk kishte si të shkonte pa u vënë re nga ekipet kryesore të Europës. Chelsea është një prej tyre dhe trajneri Tuchel i ka kërkuar përfaqësuesëve të klubit transferimin e lojtarit në verë. Por situata e lojtarit tek Real Madrid është e komplikuar. Megjithëse Militao është një nga lojtarët me rrogën më të ulët tek madrilenët (3 milionë euro në vit), ai është konsoliduar si një nga futbollistët më të rëndësishëm në ekipin e Ancelottit. Kjo do të thotë se me anë të negociatave me klubin, lojtari mund të përmirësojë shumë lehtë pozitat e tij. Në të njejtën kohë, kontrata e tij me Real është e vlefshme deri në vitin 2025.
Verën e kaluar Chelsea ishte shumë afër transferimit të Koundé nga Sevilla, por trajneri i spanjollëve Lopetegui, nuk e aprovoi lëvizjen. Londinezët tentuan të rinisnin bisedimet gjatë merkatos së janarit, por pa sukses. Ndërkohë ndjekja e Militao është akoma më e vështirë. Kjo pasi lojtari duket i kënaqur te Los Blancos dhe këta të fundit nuk kanë ndërmend ta shesin.
Transfermarkt e vlerëson kartonin e futbollistit në shifrën e 60 milionë eurove, ndërsa Madrid pagoi 50 milionë për shërbimet e tij. Në kohën e transferimit në Spanjë, lojtari ishte mbrojtësi më i shtrenjë i Real. Braziliani pati një start të vështirë me madrilenët, kjo dhe për shkak të konkurrencës së Varane dhe Ramos. Por që prej largimit të tyre, Eder ka treguar se ka potencialin e duhur për të mbrojtur prapavijën e galaktikëve.
