Drejtuesit e Chelsea kanë besim se mund të sjellin në Londër bomberin e Napoli, Victor Osimhen, pavarësisht se blutë sipas të gjitha gjasave nuk do të luajnë në Champions League sezonin e ardhshëm. Nigeriani i cili ka shënuar 21 gola në 23 ndeshje në Serie A këtë sezon, është objektivi numër 1 i Chelsea në merkaton e verës, dhe sipas mediave angleze, drejtuesit e klubit janë të gatshëm të bëjnë një ofertë financiare rekord për shërbimet e sulmuesit.
Manchester United gjithashtu është ende në kontakt me përfaqësuesit e Osimhen, por “Djajtë e Kuq” janë më të fokusuar tek Harry Kane i Tottenham. Anglezi është gjithashtu nën shënjestrën e Bayern Munich. Gjermanët janë në kërkim të një sulmuesi, dhe Osimhen është përtej mundësive të tyre financiare. Kjo favorizon akoma më shumë Chelsea. Drejtuesit e klubit londinez besojnë se mund të mposhtin çdo klub tjetër që kërkon kartonin e sulmuesit, në rastin e një lufte financiare.
Gjithsesi, afrimi i Victor Osimhen në ekip do të duhej të shoqërohej dhe me largime të pashmangshme nga Stamford Bridge. Mes emrave më të përfolur për t’u larguar në verë janë: Conor Gallagher, Kai Havertz, Christian Pulisic dhe Hakim Ziyech. Mason Mount është gjithashtu një tjetër emër që përflitet për t’u larguar në verë, pavarësisht dëshirës së drejtuesëve të Chelsea, për ta mbajtur atë në ekip.
Përveç Osimhen, Chelsea thuhet se ka arritur një marrëveshje paraprake me yllin e Leipzig, Christopher Nkunku, i cili pritet t’i bashkohet Chelsea në startin e sezonit të ri. Sulmuesi shihet si alternativa perfekte për një lojtar që pritet të luajë i pozicionuar prapa Osimhen në vijën ofensive.
Ndërkohë, PSG është një tjetër klub që mendohet se ka shfaqur interes për sulmuesin e Napoli, por francezët nuk kanë avancuar në bisedime sa klubet rivale që kërkojnë kartonin e bomberit.
