Chelsea është gati të bëjë një ofertë zyrtare në merkaton e janarit, për talentin e Monaco, Aurelien Tchouameni. Ky i fundit është prej kohësh në radarin e Chelsea, por interesi nga klube të tjera për lojtarin, mund t’i komplikojë gjërat për blutë e Londrës. Për këtë arsye, drejtuesit e klubit pritet të hidhen në aksion, që në janar.
Gjatë merkatos së verës, Chelsea ishte pranë arritjes së një marrëveshjeje me Tchouameni, por dakordi nuk u arrit. Blutë afruan Saul të Atletico Madrid, në formën e një huazimi nga spanjollët. Sipas raportimeve, Chelsea mund të siguronte shërbimet e Tchouameni për 30 milionë paundë në verë, por tashmë Monaco mund të kërkojë më shumë se 40 milionë paundë për shërbimet e 21 vjeçarit.
Për trajnerin Tuchel, Tchouameni shihet si zëvëndësuesi afatgjatë i N’Golo Kante apo Jorginho. Të dy këta lojtarë kanë dhe 18 muaj të mbetur në kontratë me londinezët. Këta të fundit do të përfitojnë dhe nga rikthimi në klub i Gallagher dhe Billy Gilmour sezonin e ardhshëm. Drejtuesit e Chelsea dëshirojnë të lidhin një parakontratë me lojtarin e Monaco, duke konkluduar më pas transferimin e tij në verë. Ky operacion i ngjan atij të afrimit të Christian Pulisic, në vitin 2019.
Lojtari mendohet se është i interesuar për një lëvizje drejt Stamford Bridge, por interesi ndaj tij është rritur gjithnjë e më shumë nga klube të tjera. Liverpool dhe Manchester United po monitorojnë nga afër futbollistin, por vëmendja për të është rritur dhe përtej Premier League. Dy rivalët e Serie A, Juventus dhe Milan e shikojnë Tchouameni si mjaft të përshtatshëm për modulin e tyre të lojës. Ndërkohë PSG është gjithashtu e interesuar, por duke parë se sa shumë yje zotërojnë parizienët në mesfushë, një lëvizje konkrete për Aurélien Tchouaméni, ka pak gjasa të ndodhë.
