Agjenti i Cristiano Ronaldo, Jorge Mendes, është në bisedime me italianët e Napoli, për një transferim të mundshëm të portugezit në Itali. Në marrëveshje mund të përfshihet dhe kartoni i sulmuesit Nigerian Victor Osimhen. Ky i fundit është një lojtar që adhurohet nga drejtuesit e “Djajëve të Kuq”, dhe kjo mund ta bëjë më të lehtë arritjen e një marrëveshjeje.
Sipas Sky Italy, Jorge Mendes po punon fort për t’i ofruar Ronaldo zgjidhjen që ai dëshiron, të luajë në Champions League; dhe në të njejtën kohë, t’i ofrojë United një zëvëndësues. Problemi qëndron në faktin se napoletanët kërkojnë të paktën 100 milionë euro për kartonin e Osimhen, dhe kjo duket një shifër mjaft e lartë për anglezët, edhe nëse Ronaldo përfshihet në marrëveshje. Sidomos duke marrë parasysh se United ka në plan të investojë rreth 100 milionë euro për kartonin e Antony të Ajax.
Napoli ndërkohë shfaqi interes për Ronaldo, që në momentin kur CR7 shprehu dëshirën për t’u larguar nga Old Trafford në verë. Portugezi ndërkohë do të duhet të pranojë një ulje të madhe page, nëse dëshiron të bëhet pjesë e klubit italian. United ndërkohë mund të kursejë shumë fonde duke hequr pagën e Ronaldos nga lista e shpenzimeve. Megjithatë, detajet janë ende të pakta dhe një plan konkret për të bërë transferimin të mundur nuk ekziston.
Mendes gjithashtu ka propozuar një tjetër alternativë për t’i hapur rrugën largimit të Ronaldo nga United. Skenari i dytë përfshin AC Milan dhe anësorin Rafael Leo në një marrëveshje të mundshme. Gjithsesi, sipas gazetarit sportiv Gianluca di Marzio, kjo ide është hedhur poshtë nga drejtuesit e Milan.
Duke parë alternativat e kufizuara, një largim i Ronaldo nga United ka pak gjasa të ndodhë në ditët e fundit të merkatos, dhe portugezi mund të largohet në janar.