Sipas prestigjozes talkSPORT, mesfushori Declan Rice do të jetë objektivi kryesor i Manchester United në merkaton e verës, dhe West Ham e ka përcaktuar tashmë çmimin e kartonit të lojtarit. Klubi kërkon plot 120 milionë paundë për Rice, dhe pavarësisht shifrës së lartë, klubet e Premier League mendohet se do të vihen në garë për shërbimet e anglezit.
Verën e kaluar, Manchester United ofroi 100 milionë paundë për Rice, por oferta u refuzua nga West Ham. Ndërkohë, Chelsea dhe Arsenal janë ende në garë për lojtarin, pavarësisht se United është më i prirur të bëjë një tjetër ofertë.
Rice u paraqit mjaft mirë në sfidën e fundit të West Ham përballë Newcastle në kampionat, që u mbyll në shifrat 1-1. Në përfundim të takimit, trajneri David Moyes theksoi se Rice do të kushtojë më shumë sesa Enzo Fernandez i kushtoi Chelsea këtë merkato janari. Moyes u shpreh:
“Declan luajti në mënyrë fantastike në pjesën e parë, ai tregoi shumë në fushë. Padyshim, ai do të jetë një lojtar i kalibrit të lartë dhe do të vendosë rekord me transferimin e tij kurdo që të largohet nga West Ham.”
Gjithsesi, drejtuesit e klubit duhet të jenë të kujdesshëm me pretendimet e tyre, pasi në fund të këtij sezoni, Rice do të hyjë në vitin e tij të fundit sipas kontratës aktuale. Kjo do të thotë se nëse në verë nuk arrihet një marrëveshje me United apo një klub tjetër, West Ham mund ta humbasë me kosto zero lojtarin, ose për një shifër shumë më të ulët në janar.
United është në avantazh për të gjetur akordin me Rice, dhe për faktin se Chelsea ka shpenzuar shifra të mëdha gjatë 2 merkatove të fundit, dhe një tjetër transferim madhor mund të ketë implikime financiare për blutë e Londrës.
