Divock Origi i ka komunikuar Liverpool së fundmi, dëshirën për t’u larguar nga klubi. Sipas prestigjozes 90min, sulmuesi është në bisedime me Inter dhe Milan, për mundësinë e një transferimi me kosto zero në Itali në fund të këtij sezoni.
Origi është një nga lojtarët më të talentuar të Liverpool, por gjatë këtij sezoni ai është aktivizuar vetëm për 71 minuta në kampionat, duke mos startuar në asnjë takim si titullar. Për më shumë, afrimi i Luis Diaz në janar ka ulur akoma më shumë shanset e Origi për të gjetur hapësira në ekipin e Jurgen Klopp.
Kontrata aktuale e sulmuesit skadon në fund të sezonit dhe burime pranë Liverpool kanë bërë me dije se drejtuesit e klubit kanë qënë të gatshëm t’i ofrojnë Origit një kontratë të re. Por, ka qënë vet ky i fundit që duket se nuk ka pranuar duke thënë se po kërkon një ekip ku mund të aktivizohet si titullar. Kjo lidhet dhe me faktin se lojtari kërkon të sigurojë vendin e tij në kombëtaren belge, në prag të Kupës së Botës.
Milan është klubi më i interesuar për kartonin e Origi, por rivalët e Inter gjithashtu kanë kontaktuar lojtarin. Në të njejtën kohë, disa ekipe të Premier League gjithashtu po monitorojnë situatën e Origi, por sulmuesi kërkon një aventurë të re përtej Anglisë.
26-vjeçari konsiderohet një hero nga shumë tifozë të Liverpool, pasi ka shënuar disa gola mjaft të rëndësishëm gjatë kohës së tij në klub, zakonisht si zëvëndësues në fushë. Origi shënoi golin e katërt dhe vendimtar në fitoren mahnitëse ndaj Barcelonës në gjysmëfinalen e Ligës së Kampionëve në vitin 2019, përpara se të shënonte golin e dytë në finalen kundër Tottenham në Madrid. Megjithatë, duket se belgu është tashmë gati për destinacionin e rradhës në karrierën e tij.
