Sipas burimeve të ESPN, drejtuesit e Manchester United janë të bindur se Ronaldo do të qëndrojë në Old Trafford në janar, më së shumti për shkak të mos-interesimit nga klubet e tjera. “Djajtë e Kuq” po përgatiten për një tjetër “push” për t’u larguar nga ana e portugezit, duke qënë se CR7 nuk po siguron dot vendin e titullarit në ekipin e Erik ten Hag.
Ronaldo gjithashtu kërkon të luajë në Champions League, dhe në bazë të rregullave të UEFA, sulmuesi mund të aktivizohet në Champions me një ekip të ri vitin e ardhshëm, pavarësisht se është aktivizuar në Europa League këtë vit me United.
Ndërkohë, pavarësisht dëshirës së madhe të portugezit për t’u larguar në verë, klubi anglez mori vetëm 1 ofertë serioze nga Arabia Saudite. Gjithsesi, kjo nuk u konsiderua fare, as nga Ronaldo, dhe as nga drejtuesit e United.
Gjatë merkatos së verës, kishte shumë spekullime që lidhën sulmuesin me një lëvizje drejt Chelsea, Napoli dhe Bayern Munich. Por asnjë prej klubeve nuk hodhi një hap konkret për t’u përfshirë në bisedime me agjentin e CR7. Sipas burimeve të ESPN, qëndrimi i Chelsea në lidhje me transferimin e mundshëm të Ronaldo ka ndryshuar, që prej ardhjes në krye të pankinës të Graham Potter. Kjo dhe për shkak të afrimit të Pierre-Emerick Aubameyang në ekip, që duket se ka zgjidhur problemin kryesor të londinezëve në sulm.
Ronaldo ndërkohë po kalon një sezon mjaft të vështirë këtë vit, teksa ka shënuar vetëm 1 gol, në Europa League dhe asnjë në kampionat. Trajneri Ten Hag zbuloi së fundmi se CR7 është i acaruar me faktin se nuk po merr më shumë minuta në fushë. Megjithatë, burime të ESPN bëjnë me dije se tekniku hollandez nuk do që sulmuesi të largohet në janar.
