Sipas burimeve të ESPN, disa prej ekipeve më prestigjoze në Premier League, janë të interesuara në shërbimet e Eden Hazard të Real Madrid. Mes tyre, Chelsea dhe Newcastle janë ekipet më të interesuara për të bërë të vetin kartonin e futbollistit. 30 vjeçari ndërkohë ende nuk i ka bërë të qarta dëshirat e tij mbi të ardhmen.
Gjithsesi, duket se Hazard po kalon një moment të vështirë tek Real Madrid. Belgu u la në stol në El Clasicon që madrilenët fituan ndaj Barcelonës, dhe trajneri Carlo Ancelotti e bëri të qartë se preferon dikë tjetër në vend të Hazard. Italiani u shpreh:
“Problemi me Hazard është se ai ka një trajner që preferon një lojtar tjetër. Kjo gjë mund të ndodhë në një skuadër si Real Madrid. Ajo që është e rëndësishme është që lojtari të ketë motivimin për të punuar. Dhe ai po e bën këtë.”
Në qershor Eden u shpreh se dëshiron që të ketë një karrierë të suksesshme te Real Madrid. Por dëmtimet e shumta janë bërë pengesë serioze për qëllimin e sulmuesit belg. Hazard është aktivizuar në vetëm 25 ndeshje në La Liga, që prej ardhjes së tij në Bernabeu. Në 52 paraqitje gjithsej me madrilenët, sulmuesi ka shënuar vetëm 5 gola.
Ndërkohë largimi i tij duket një mundësi reale, duke marrë parasysh dhe objektivat e Real Madrid në merkato. Kylian Mbappe i Paris Saint-Germain është prej kohësh në radarët e spanjollëve, dhe vet francezi ka bërë publike dëshirën e tij për t’iu bashkuar galaktikëve. Duke marrë parasysh faktin se Mbappe aktivizohet në të njejtin pozicion me Hazard, në rast se transferimi i tij bëhet realitet, hapësirat për belgun do të jenë shumë të vogla në formacion.
Për të mos përmendur faktin që Real Madrid është gjithashtu në ndjekje të Erling Haaland, me klubin madrilen që po bën planet për të siguruar financat e nevojshme, për kartonin e bomberit të Dortmund.