Barcelona ka filluar që tani përgatitjet për sezonin e ardhshëm, dhe duke u nisur nga situata e vështirë financiare e klubit, fokusi i katalanasve është tek lojtarët me kosto transferimi zero. Një prej tyre është dhe ylli i Milan, Franck Kessie.
Mesfushorit i skadon kontrata me italianët në 30 qershor, që do të thotë se ai do të jetë agjent i lirë, pra “free agent” në merkaton e verës. Drejtuesit e Barcelonës kanë parë impaktin që lojtari ka patur në lojën e Milan, dhe e shohin atë si alternativën perfekte për të përforcuar mesfushën e Barcelonës. Që prej transferimit te “kuqezinjtë” nga skuadra e Atalantës, Kessie ka treguar pjekuri dhe karakter në fushën e blertë, në gati çdo paraqitje me Milan.
Lojtari i cili gjithashtu aktivizohet me kombëtaren e Bregut të Fildishtë, thuhet se i pëlqen ideja e transferimit në Spanjë. Kjo pavarësisht interesimit të Paris Saint-Germain dhe Liverpool, 2 ekipe me mjaft potencial në Europë. Sipas Transfermarkt, nëse Kessie nuk do t’i skadonte kontrata në fund të sezonit, kartoni i tij do të kishte një vlerë rreth 40 milion euro. Kjo tregon dhe një herë potencialin e tij.
Trajneri Xavi ende ka besim te Sergio Busquets, por ai e di se veterani spanjoll nuk mund të luajë përgjithmonë. Mesfushori do të mbushë 34 vjeç në qershor dhe drejtuesit në Camp Nou duhet të mendojnë për një zëvëndësues afatgjatë, të të njejtit kalibër. Pavarësisht stilit disi të ndryshëm të lojës nga Busquets, Kessie duket se është në nivelin e duhur.
Lojtari ka shënuar 5 gola deri më tani me Milan, gjatë këtij sezoni. Vitin e kaluar ai realizoi 14 gola, gjë që dëshmon se transferimi i tij në Camp Nou, do t’i sillte një tjetër prespektivë sulmit të Barcelonës. Mbetet për t’u parë nëse drejtuesit katalanas do të arrijnë të bindin Kessie për t’iu bashkuar blaugranave.