Sipas raportimit të GOAL, përfaqësuesit e Gabriel Jesus janë në bisedime me Arsenal, për një transferim të mundshëm të brazilianit në verë. Ekipi i Mikel Artetës po shpreson të sjellë sulmuesin e Manchester City në Emirates, teksa po kërkon opsione që të përforcojë sulmin për sezonin e ardhshëm.
Jesus po kërkon një ekip ku mund të aktivizohet si titullar, pasi braziliani e ka humbur këtë rol tek City. Gabriel është aktivizuar në 24 ndeshje në Premier League gjatë këtij sezoni, por në vetëm 17 prej tyre ka luajtur si titullar. Sulmuesi po hyn drejt vitit të tij të fundit të kontratës me “qytetarët” dhe drejtuesit e City duhet të vendosin shpejt në lidhje me fatin e tij. Në të kundërt, klubi rrezikon që të humbasë talentin me kosto zero, në një moment të dytë.
Paraqitjet fantastike përballë Watford në kampionat, dhe Real Madrid në Champions League mund t’i kenë ndryshuar mendjen trajnerit Guardiola, për rolin e Jesus në skuadër. Por kjo nuk ka ndalur agjentin e lojtarit që të zhvillojë bisedime me drejtorin teknik të Arsenal, Edu, për një marrëveshje të mundshme.
Interesi që Pep Guardiola dhe drejtuesit e City kanë shfaqur për yllin e Dortmund, Erling Haaland, mund të ketë ndikuar tek fakti që Jesus po merr në konsideratë opsione të tjera në verë. Nëse transferimi i Haaland në Etihad zyrtarizohet Gabriel do ta ketë akoma më të vështirë të gjejë hapësira.
Vet futbollisti ka refuzuar të komentojë mbi të ardhmen e tij, duke thënë se tani nuk është momenti i duhur. Pasi u pyet nga reporterët ai deklaroi:
“Mendoj se nuk është koha që të flasim për këtë. Tani është momenti më i mirë i sezonit dhe dua ta shijoj, të fokusohem tek skuadra dhe të ndihmoj shokët e ekipit për të fituar Premier League-ën.”