Sipas raportimeve më të fundit të DailyMail në Angli, Manchester City ka arritur akordin për një marrëveshje me bomberin e Dortmund, Erling Haaland. Bëhet me dije se detajet personale të kontratës janë diskutuar mes lojtarit dhe “qytetarëve”, dhe tashmë, drejtuesit e City po përgatisin dokumentat e transferimit.
Nëse lajmi konfirmohet, ky do të jetë padyshim një zhvillim i madh në botën e futbollit. Sulmuesi norvegjez ka një klauzolë për prishjen e kontratës prej 63 milionë paundësh, dhe agjenti i tij Mino Raiola gjithashtu pritet të fitojë një përqindje të konsiderueshme nga operacioni. Të gjitha kostot e transferimit të përllogaritura së bashku mendohet të jenë rreth 100 milionë paundë, një shifër kjo e lartë por jo e papërballueshme për pronarët e pasur të Manchester City.
Ndërkohë, Barcelona dhe Paris Saint-Germain vazhdojnë të shprehin interesin e tyre për Haaland, por rivali më i fortë i City mbetet Real Madrid. Presidenti Perez ende nuk ka ndërmend të heqë dorë nga ideja e një dysheje Mbappe-Haaland në vijën ofensive të galaktikëve. Por momentalisht duket se norvegjezi sipas të gjitha gjasave do të luajë në Premier League sezonin e ardhshëm.
Babai i futbollistit, Alfie Haaland, ka luajtur për 3 sezone me Manchester City, dhe influenca e tij ka luajtur një rol të rëndësishëm në përzgjedhjen e destinacionit të ardhshëm të asit të Dortmund.
Guardiola nga ana tjetër ka përsëritur disa herë nevojën e klubit për të sjellë në ekip një sulmues të mirëfilltë. Që prej largimit të Sergio Aguero, “qytetarët” nuk kanë mundur të gjejnë një “numër 9”, megjithëse mungesa e tij nuk është ndier shumë, falë taktikave të mirëmenduara të trajnerit spanjoll.
Por Erling Haaland do të ishte padyshim një vlerë e shtuar për City, që kryeson Premier League-ën angleze, dhe synon suksesin e shumëpritur në arenën europiane.
