Sipas raportimit më të fundit të prestigjozes Mirror, Harry Kane ka hedhur poshtë mundësinë e transferimit tek Manchester United. Lojtari është linkuar prej kohësh me një lëvizje drejt “Djajëve të Kuq”, por burime të afërta pranë tij kanë bërë me dije se Kane jo vetëm që nuk do të luajë për United sezonin e ardhshëm, por do të qëndrojë përsëri tek Tottenham.
Por çfarë e bëri Kane të marrë këtë vendim?
Vetëm para 2 ditësh u publikua lajmi se drejtuesit e Manchester United kanë rënë paraprakisht dakord me hollandezin Erik ten Hag, për rolin e trajnerit të ardhshëm të klubit. Tekniku i Ajax është një fans i Kane, dhe Ten Hag patjetër që do të donte të kishte sulmuesin e Tottenham në ekipin e tij.
Megjithatë, Kane ende ka një lidhje të veçantë me ish-trajnerin e tij Mauricio Pochettino, kandidatura e të cilit u hodh poshtë për stolin e United, duke qënë se u arrit një marrëveshje me Ten Hag. Kane do të preferonte që të ribashkohej dhe një herë me ish-trajnerin e tij por duke qënë se kjo gjë tashmë ka shumë pak gjasa të ndodhë, lojtari ka përjashtuar një lëvizje në Old Trafford.
Një tjetër faktor që padyshim ka patur ndikimin e vet në zgjedhjen e Kane, është fakti se United sipas të gjitha gjasave nuk do të luajë në Champions League sezonin e ardhshëm. Tottenham nga ana tjetër ka shanse reale të kualifikohet në kompeticionin prestigjoz, teksa trajneri Conte po bën një punë fantastike me Spursat, sidomos në javët e fundit.
Nën drejtimin e italianit, Kane është rikthyer përsëri tek forma e tij më e mirë, pas një starti të vështirë të sezonit. Vitin e kaluar kapiteni i kombëtares angleze ishte shumë pranë një transferimi drejt Manchester City, por operacioni nuk u realizua pas këmbënguljes së presidentit të Spursave për të mbajtur Kane në Wembley.