Bashkëpronari i klubit amerikan të futbollit Inter Miami, Jorge Mas, ka bërë me dije se ekipi do të hidhet në sulm për të marrë shërbimet e Lionel Messit. Mas ka lënë të kuptohet se marrëdhënia e mirë e David Beckham me Paris Saint-Germain, mund të jetë faktor i rëndësishëm për të finalizuar lëvizjen e bujshme.
Ishte pikërisht Beckham ai që themeloi klubin e Inter Miami në vitin 2018, së bashku me Jorge Mas dhe djalin e tij Jose Mas. Qëllimi ishte krijimi i një “dinastie” të vërtetë futbolli dhe ekspozimi më në masë i sportit në Shtetet e Bashkuara. Fansave iu premtuan transferime të emrave të mëdhenj, ku mes të cilëve Blaise Matuidi dhe Gonzalo Higuain i janë bashkuar tashmë Inter Miami. Por nënshkrimi me Leo Messin mbetet objektivi kryesor i Beckham.
Së fundmi është raportuar se Messi mund të largohet nga PSG në merkaton e ardhshme verore. Megjithëse lëvizja e tij në Paris bëri shumë bujë, argjentinasi duket se ende nuk e ka gjetur formën e tij më të mirë. Pas 23 ndeshjesh në Francë, ai ia ka dalë të shënojë vetëm 3 gola.
I pyetur mbi transferimin e Messi tek Inter Miami, Jorge Mas deklaroi:
“Leo Messi është ende një nga lojtarët më të mirë në botë, aftësitë e tij nuk janë zhdukur. Mendoj se David ka një marrëdhënie me të, dhe nëse largohet nga PSG, do të donim ta shihnim atë si një lojtar të Inter Miami. A mund të ndodhë? Ne do ta shtyjmë përpara. Në zemër jam optimist. Mendoj se ekziston një mundësi.”
Vet Beckham nuk e ka përjashtuar mundësinë e transferimit të Leo Messi në MLS, teksa ka thënë se objektivi i Inter Miami ka qënë gjithmonë që të ketë në skuadër, lojtarët më të mirë në botë.