Manchester United po eksploron mundësitë e ndryshme për të sjellë në Old Trafford, asin e Tottenham, Harry Kane. Sipas burimeve të ESPN, përveç shumës monetare, drejtuesit e “Djajëve të Kuq” mund të përfshijnë në operacion dhe francezin Anthony Martial.
United kërkon të sjellë në skuadër një sulmues në merkaton e ardhshme verore dhe kapiteni i kombëtares angleze është një nga alternativat. Tottenham e vlerëson me 100 milionë paundë kartonin e Kane, por ky vlerësim cilësohet disi jo real nga ana e United. Kjo dhe për shkak të moshës së sulmuesit, i cili do të mbushë 29 vjeç në korrik. Për këtë arsye, drejtuesit e “Djajëve të Kuq” mund t’i ofrojnë Tottenham kartonin e Anthony Martial, për të ulur disi koston e transferimit të Kane.
Martial ka një kontratë aktive deri në vitin 2024 me Manchester United. Ai momentalisht luan si i huazuar te Sevilla, por klubi spanjoll ka dhënë shenja se nuk ka ndërmend të blejë përfundimisht kartonin e Martial.
United është në kërkim të një sulmuesi të konfirmuar në arenën europiane, duke qënë se Edinson Cavani sipas të gjitha gjasave do të largohet në fund të sezonit. Uruguaiani kërkohet nga shumë disa ekipe në Spanjë, Itali dhe Amerikën Latine. Në të njejtën kohë, e ardhmja e Cristiano Ronaldo është gjithashtu në dyshim. 37 vjeçari ka dhe 1 vit të mbetur në kontratën e tij, me opsion për të rinovuar për një vit tjetër shtesë. Gjithsesi, portugezi ende nuk e ka vendosur nëse do të qëndrojë në Old Trafford. Me shumë mundësi United nuk do të luajë në Champions League sezonin e ardhshëm dhe kjo pritet të ndikojë në vendimin e Ronaldo.
Trajneri i ri i klubit gjithashtu do të shprehë mendimin e tij në lidhje me transferimin e Kane.
