Manchester United, Newcastle United dhe Aston Villa janë të gjitha duke monitoruar yllin portugez të Atletico Madrid, Joao Felix. Sulmuesi pritet të luajë si i huazuar edhe sezonin e ardhshëm, për të paktën pjesën e parë tij. Kjo pasi mundësitë për një vend titullari tek Chelsea duken të pakëta, dhe blutë e Londrës nuk mund të kënaqin kërkesat e portugezit. Kujtojmë se Felix u aktivizua si i huazuar tek Chelsea sezonin e kaluar, që prej merkatos së janarit.
Megjithatë, Felix e pati të vështirë të gjente rrugën e rrjetës duke shënuar vetëm 4 gola në 16 paraqitje me londinezët. Kjo është dhe arsyeja se përse lojtari kërkon tashmë një aventurë të re dhe këtë dëshirë ia ka bërë të qartë dhe agjentit të tij, Jorge Mendes. Këtu hyjnë në lojë United, Newcastle dhe Villa që janë të interesuara për një marrëveshje në formë huazimi.
Të gjitha ekipet janë në kontakt me lojtarin, por Joao mësohet se është i interesuar vetëm për klubet ku mund të luajë në Champions League sezonin e ardhshëm. Kjo do të thotë se Aston Villa nuk është klubi i favorizuar, duke qënë se United dhe Newcastle do të luajnë në kompeticionin elitar europian.
Sipas mediave angleze, sulmuesi nuk dëshiron të largohet nga Premier League. Pas eksperiencës së tij të parë me Chelsea, Joao është i vendosur të tejkalojë vështirësitë dhe të garojë si pjesë e një klubi elitar për të fituar trofe. Vlera e kartonit të Felix ka pësuar rënie të ndjeshme që prej transferimit të tij rekord tek Atletico Madrid. Kujtojmë se spanjollët paguan plot 113 milionë paundë për të marrë kartonin e tij nga Benfica në vitin 2019.
Megjithatë, drejtuesit e Atletico e dinë se nuk mund të përfitojnë atë shifër nëse Joao do të shitej sot, dhe opsioni i huazimit duket se është perfekt si për lojtarin, ashtu dhe për klubin madrilen.