Sipas raportimeve të fundit të MARCA, drejtuesit e Real Madrid po ndjekin me vëmendje situatën e Jude Bellingham tek Borussia Dortmund. Superstari anglez ka qënë prej kohësh nën radarin e “galaktikëve”, por duket se presidenti Florentino Perez është duke menduar një strategji konkrete sesi të sjellë lojtarin në Santiago Bernabeu.
Çështja kyçe që do të përcaktojë të ardhmen e Bellingham është fakti nëse sulmuesi do të rinovojë apo jo kontratën e tij me klubin aktual. Këtu hyn pikërisht në lojë dhe Real Madrid. Madrilenët dështuan në objektivin e tyre madhor të merkatos, që ishte afrimi i Kylian Mbappe në ekip. Kjo bëri që vëmendja e drejtuesëve spanjollë të përqëndrohet tashmë tek lojtarë që janë të gatshëm të presin dhe 1 vit për t’iu bashkuar galaktikëve.
Kjo është situata e Bellingham, i cili ka vendosur të rrijë dhe sezonin e ardhshëm tek Dortmund. Tashmë është konfirmuar se përfaqësuesit e Real Madrid kanë udhëtuar drejt Gjermanisë për të parë live në fushën e blertë, talentin e kombëtares së “3 Luanëve”. Mediat spanjolle bëjnë me dije se klubi galaktik e sheh Bellingham si lojtarin perfekt për periudhën e tranzicionit në mesfushë. Real mbështetet ende fort tek Modric dhe Toni Kroos në këtë repart, por të dy mesfushorët janë në hapat e fundit të karrierës së tyre. Bellingham, së bashku me Fede Valverde, Eduardo Camavinga dhe Tchouameni, kanë shansin të krijojnë një brez të artë tek 14 herë kampionët e Europës.
Lojtari i Dortmund iu bashkua gjermanëve në vitin 2020 për shifrën e 25 milionë eurove. Ai shihet si një nga talentet më premtues në Europë. Kjo sigurisht do të thotë se konkurrenca për kartonin e tij do të jetë e lartë. Megjithatë, Real Madrid ngelet gjithmonë një nga alternativat më joshëse për çdo talent të ri.