Duket se aventurës së suksesshme 7 vjeçare të Angel di Maria te PSG, po i vjen fundi. Drejtuesit parizienë nuk kanë ndërmend t’i ofrojnë mundësinë e rinovimit mesfushorit, i cili sipas të gjitha gjasave do të largohet me kosto zero në fund të sezonit. Kjo ka tërhequr vëmendjen e Juventus në Itali, që ka shtuar Di Marian në listën e objektivave për sezonin e ardhshëm.
Sipas prestigjozes GOAL, “Zonja e Vjetër” është momentalisht në bisedime me argjentinasin. Ky i fundit iu bashkua PSG në vitin 2015 nga Manchester United për shifrën e 52 milionë eurove. 34 vjeçari ka qënë një lojtar kyç i ekipit të Mauricio Pochettino gjatë këtij sezoni, por Di Maria është i prirur të konsiderojë një sfidë të re në Itali.
Sipas mediave italiane, Juventus i ka propozuar një kontratë 1 vjeçare mesfushorit, por negociatat janë ende në proces pasi përfaqësuesit e Di Maria kërkojnë opsionin e një viti shtesë në kontratë. Massimiliano Allegri është i besimit se lojtari është perfekt për skuadrën e tij, duke marrë parasysh eksperiencën dhe teknikën e lartë që zotëron.
Vet Di Maria ndërkohë ka dashur fillimisht të qëndrojë në Paris, duke qënë se familja e tij është sistemuar prej kohësh në kryeqytetin francez. Por ai mund të humbasë lehtësisht rolin e titullarit sezonin e ardhshëm, edhe nëse ia del të qëndrojë në Francë. Nga ana tjetër, lojtari ende nuk e konsideron një rikthim në Argjentinë, duke qënë se nuk do të pranojë një ulje të madhe rroge.
Transferimi tek Juventus është padyshim një opsion shumë më i mirë. Ekipi i Allegrit ka nevojë për kreativitet në mesfushë dhe Di Maria është padyshim lojtari i duhur për këtë detyrë. Gjithsesi, zyrtarizimi është ende larg dhe sipas të gjasave nuk do të ndodhë deri në fund të sezonit.
