Liverpool, Manchester United dhe Manchester City janë të gjithë duke monitoruar situatën e Mason Mount tek Chelsea. Mesfushori i talentuar ka një kontratë aktive me blutë e Londrës deri në fund të sezonit të ardhshëm. Gjithsesi, sipas mediave angleze, shumë pak progres është bërë përsa i përket një rinovimi të mundshëm të Mount në Stamford Bridge. Kjo ka bërë që klubet rivale në Angli të qëndrojnë të vëmendshëm ndaj situatës.
Një nga problemet kryesore për ngecjen e bisedimeve mes anglezit dhe klubit mendohet të jetë fakti se lojtari heziton të firmosë një kontratë afatgjatë, e ngjashme me kontratat e tjera të firmosura pas marrjes së presidencës së Chelsea nga Todd Boehly. Gjithashtu, Mount kërkon dhe rritjen e pagës së tij javore, e cila momentalisht mendohet të jetë rreth 80 mijë paundë.
Mesfushori kërkon një pagë që reflekton statusin e tij si lojtar i kombëtares angleze dhe emër bazë në formacionin e Chelsea. Së fundmi, Reece James firmosi një kontratë të re 5 vjeçare me klubin londinez, dhe lojtari do të përfitojë plot 250 mijë paundë në javë, një diferencë mjaft e madhe nga paga e Mount.
Ndërkohë, City, Liverpool dhe United janë të gatshëm të shfyrtëzojnë pakënaqësitë e mundshme të Mount, duke qënë se janë në kërkim të një mesfushori. Vet anglezi mendohet se preferon një lëvizje brenda Premier League, duke qënë se është i familjarizuar me stilin e lojës dhe ka më shumë shanse për të ngritur një trofe madhor.
Megjithatë, përveç ekipeve angleze, mediat spanjolle kanë bërë me dije se Mount mund t’i ofrohet dhe Atletico Madrid, në përpjekje që Chelsea të blejë përfundimisht kartonin e Joao Felix nga spanjollët. Juventus gjithashtu ka shfaqur interes për Mount, por italianët qëndrojnë më poshtë në listën e preferencave të mesushorit të talentuar.
