Drejtuesit e Liverpool janë duke bërë gati një ofertë zyrtare për kartonin e Mason Mount. Sipas mediave angleze, “The Reds” kanë gati dhe kontratën për Mount, teksa Jurgen Klopp ka kohë që kërkon të sjellë lojtarin në Anfield. Liverpool kryeson momentalisht garën për shërbimet e mesfushorit të talentuar, por Chelsea gjithashtu nuk dëshiron të heqë dorë prej lojtarit.
Gjithsesi, mendohet se Mount është i pakënaqur në Stamford Bridge, pavarësisht dashurisë së tij për klubin ku është rritur si lojtar. Chelsea ka dështuar të përmbushë dëshirat financiare të anglezit, dhe konkurrenca nga klubet rivale në Premier League për kartonin e Mount po bëhet gjithnjë e më e ashpër.
Presidenti i Chelsea, Todd Bohley, kërkon të ulë shpenzimet e pagave të lojtarëve, duke u nisur dhe nga afrimet e reja në dy merkatot e fundit, që i kanë kushtuar shumë klubit. Kjo ka bërë që shumë lojtarë veteranë të klubit ende nuk kanë përfituar kontrata të reja. Situata ka vënë në presion drejtuesit e Chelsea, të cilët janë të vetëdijshëm për faktin se Mount, apo dhe lojtarë të tjerë, mund të përfitojnë më shumë në një ekip tjetër në Premier League.
Ndërkohë në lidhje me Mount, anglezi nuk dëshiron të largohet nga Chelsea, por është i gatshëm ta hedhë këtë hap nëse nuk shikon një ndryshim në qëndrimin e klubit. Nga ana tjetër, Liverpool po përgatitet për një periudhë të vështirë tranzicioni, por kjo paraqet dhe një mundësi mjaft tunduese për lojtarët e rinj që duan t’i bashkohen “The Reds”. Klubi është në kërkim të një drejtuesi sportiv të ri, dhe një nga emrat e përmendur është Tim Steidten, ish-drejtori sportiv i Bayer Leverkusen. Gjithsesi, Steidten pritet të bisedojë dhe me klube të tjera, përpara se të vendosë përfundimisht mbi aventurën e tij të rradhës, por Liverpool është padyshim një opsion me mjaft peshë në listë.