Mesfushori italian Manuel Locatelli do të jetë tashmë pjesë e Juventus, për 2 sezone, në formën e huazimit nga ekipi i Sassuolo. Në përfundim të periudhës së huazimit, futbollisti do të bëhet zyrtarisht lojtar i “Zonjës së Vjetër”, dhe do të jetë në Torino dhe për 3 vite të tjera. Dy palët gjithashtu kanë rënë dakord për termat financiarë, dhe kartoni i futbollistit do t’i kushtojë Juventus 37.5 milionë euro.
Këta të fundit dështuan të fitojnë Serie A, për herë të parë që prej dominimit për 9 sezone që nga viti 2012. Juventinët e mbyllën kampionatin në vendin e katërt dhe kjo ishte një nga arsyet e shkarkimit të trajnerit Andrea Pirlo. Italianët rikthyen në ekip Massimiliano Allegrin, me të njejtin objektiv si më parë, triumfin në Champions League dhe titullin kampion në Serie A.
Ndërkohë nga Anglia, raportimet më të fundit tregojnë se Liverpool mund të jetë destinacioni i rradhës për talentin norvegjez Erling Haaland. Nëse transferimi bëhet realitet, tifozët e “The Reds” nuk kanë më arsye për t’u ndierë “xhelozë” me rivalët e tyre në Premier League. Kujtojmë se Manchester United, Chelsea, Manchester City dhe Arsenal kanë afruar të gjithë përforcime në këtë merkato vere.
Në mënyrë disi të pazakontë, ka qenë Michael Rummenigge i cili është shprehur se me shumë mundësi, e ardhmja e Haaland do të jetë në Angli. Ish-drejtuesi i Bayern Munich ka deklaruar:
“Duhet të presim dhe të shohim se ku do të shkojë Haaland pas këtij sezoni. Real dhe Barcelona kanë probleme financiare prandaj mendoj se ai mund të lëvizë drejt Anglisë. Babai i tij gjithashtu ka luajtur atje. E shikoj Liverpool si një mundësi të mirë për Haaland.”
Gjermani është i mendimit se sulmuesi i Dortmund dhe Kylian Mbappe i PSG do të jenë lojtarët që do të dominojnë futbollin në dekadën e ardhshme.
