Mesfushori veteran i Manchester City, Fernandinho, ka bërë publike dëshirën për t’u larguar nga Etihad në fund të sezonit. Kjo gjë ka vënë në lëvizje drejtuesit e klubit anglez, të cilët duhet të shpejtojnë për të gjetur një zëvëndësues të denjë për rolin e brazilianit. Ky i fundit sipas të gjitha gjasave do të kthehet në Brazil, për të kaluar vitet e fundit të karrierës së tij.
Pep Guardiola ndërkohë e ka në mendje një emër për zëvëndësuesin e Fernandinho. Bëhet fjalë për lojtarin e Real Sociedad, Mikel Merino. Ish-futbollisti i Newcastle nuk ia doli asnjëherë të fitonte statusin e një mesfushori elitar, gjatë kohës së aktivizimit të tij në Angli. Megjithatë, gjërat duken shumë ndryshe në Spanjë, ku lojtari po shkëlqen me paraqitjet e tij.
Momentalisht, zgjedhja e parë e Guardiolës në qendër të mesfushës është Rodri. Por spanjolli është më shumë një mesfushor organizativ, sesa një lojtar me tipare difensive. Merino ndërkohë i ka të dyja dhe shumë persona e krahasojnë me legjendën e Real Madrid, Xabi Alonso.
Në rast se transferimi zyrtarizohet, Merino do ta ketë të vështirë të mposhtë Rodri për vendin e titullarit, por Pep Guardiola mund ta ndihmojë lojtarin e Sociedad që të familjarizohet në një pozicion tjetër në mesfushë. Edhe nëse nuk ia del të sigurojë vendin e titullarit, Merino mund të rrisë vlerën e kartonit të tij në treg. Momentalisht shërbimet e tij vlerësohen në shifrën 45 milionë paundë nga Transfermarkt.
City ndërkohë ende po lufton për të sjellë në Etihad, bomberin e Borussia Dortmund, Erling Haaland. Sulmuesi norvegjez thuhet se së fundmi ka refuzuar një ofertë të majme të kampionëve të Anglisë. Gjithsesi, kjo nuk ka demotivuar drejtuesit e “qytetarëve”, të cilët ende besojnë se janë ekipi që kryeson garën për kartonin e Haaland.
