Manchester City duket se është një hap para rivalëve, në garën për shërbimet e mesfushorit të talentuar të West Ham, Declan Rice. Lojtari është gjithashtu objektiv i Chelsea, Liverpool dhe Arsenal, por “qytetarët” janë të gatshëm t’i shkojnë deri në fund interesimit të tyre, edhe nëse kjo do të përkthehet në një luftë të ashpër financiare.
Rice është një nga mesfushorët më të kërkuar në ditët e sotme, teksa ka fituar stausin e titullarit dhe tek kombëtarja angleze. Megjithatë, kontrata e tij me West Ham skadon në verën e vitit 2024 dhe sipas të gjitha gjasave Rice do të zgjedhë një destinacion të ri për të vijuar karrierën e tij. Pavarësisht përpjekjeve të West Ham për ta bindur atë të qëndrojë, lojtari ka refuzuar firmosjen e një kontrate të re.
Në këtë situatë, klubi londinez mendohet se kërkon mbi 100 milionë paundë për shërbimet e Rice, dhe pavarësisht shumës stratosferike, duket se përsëri do të ketë një luftë për kartonin e anglezit. Manchester City është ekipi favorit, jo vetëm për shkak të potencialit financiar që klubi zotëron, por dhe duke marrë parasysh largimet potenciale që do të ndodhin në verë. Mes tyre mendohet se janë Ilkay Gundogan, Bernardo Silva dhe Kalvin Phillips. Kjo i hap derën mundësisë së transferimit të Rice në Etihad. Mesfushori gjithashtu është i prirur të konsiderojë seriozisht ofertën, duke qënë se vendi i titullarit është mëse i garantuar në rastin e largimeve.
Në lidhje me Arsenal, nuk mund të thuhet me siguri nëse londinezët janë të gatshëm të paguajnë shumën e kërkuar nga West Ham për Rice. Ndërkohë që bordi i Manchester United nuk është më njësoj i motivuar për të sjellë mesfushorin në Old Trafford, pas transferimit të Casemiro, i cili i ka dhënë mjaft siguri “Djajëve të Kuq”.
Liverpool mbetet i përqëndruar tek Jude Bellingham si objektiv kryesor, ndërkohë që Chelsea ka shpenzuar shuma të mëdha parash në 2 merkatot e fundit, dhe ende nuk është i sigurtë nëse duhet të bëjë një tjetër investim të madh në mesfushë, pas afrimit të Enzo Fernandez.
