Manchester City ka hedhur një hap të madh drejt transferimit të bomberit Erling Haaland, në Etihad. Sipas raportimeve të Dailymail, mësohet se drejtuesit e klubit anglez kanë rënë dakord me kërkesat e përfaqësuesëve të norvegjezit. Nëse gjithçka shkon sipas planit, marrëveshja mes dy palëve pritet të vuloset brenda javës së ardhshme.
Mediat angleze kanë bërë me dije se “qytetarët” kanë rënë dakord për t’i ofruar Haaland një pagë prej 500,000 paundësh në javë, shifër që do ta bënte atë lojtarin më të paguar në Premier League. Kontrata pritet të jetë 5 vjeçare teksa City do të paguajë minimalisht 63 milionë paundë për të aktivizuar klauzolën e largimit të Haaland nga Dortmund.
Javën e kaluar gjermanët insistuan duke thënë se ende nuk kishte asnjë marrëveshje mes City dhe Dortmund për shërbimet e Haalad, dhe se klubi po shikonte paralelisht mundësi të tjera. Këtu bëhej fjalë për Real Madrid dhe PSG. Por tani duket se Pep Guardiola ia ka dalë të realizojë ëndrrën e tij për të sjellë sulmuesin në Manchester. Trajneri spanjoll dështoi të sillte Harry Kane në ekip gjatë merkatos së verës vitin e kaluar, pavarësisht insistimit të pazakontë të drejtuesëve të City.
Mësohet se babai i Haaland, i cili si ish-futbollist është aktivizuar me “qytetarët”, është përfshirë në mënyrë intensive në negociatat me klubin anglez. Nëse marrëveshja zyrtarizohet në verë, Haaland mund të bëjë debutimin e tij me City në Amerikë. Kjo pasi të besuarit e Pep do të luajnë 2 miqësore në kontinentin amerikan gjatë verës.
Sulmuesi norvegjez shënoi 2 gola në fitoren e thellë 6-1 të Dortmund ndaj Wolfsburg ditën e shtunë. Gjatë këtij sezoni Haaland ka shënuar gjithsej 33 gola në 31 takime me Dortmund dhe kombëtaren norvegjeze. Lojtari ia doli të kthehej tek forma e tij më e mirë shumë shpejt, pas një dëmtimi delikat.