Manchester City duket se kryeson garën për kartonin e talentit të Brighton, Alexis Mac Allister. Argjentinasi tërhoqi vëmendjen e mbarë botës gjatë botërorit të Katarit, dhe tashmë është nën shënjestrën e disa klubeve “big” në Premier League, përfshirë këtu dhe “qytetarët”.
Sipas prestigjozes DailyStar në Angli, Pep Guardiola beson se Mac Allister do të jetë lojtari perfekt për City në startin e sezonit të ardhshëm. Megjithatë, konkurrenca për kartonin e tij pritet të jetë e ashpër, teksa Chelsea, Arsenal dhe Liverpool janë gjithashtu në garë. Momentalisht, Brighton e vlerëson kartonin e futbollistit në shifrat e 70 milionë paundëve. Gjithsesi, në rastin e një beteje mes klubeve angleze për shërbimet e tij, shifra pritet të rritet.
Guardiola gjithashtu kërkon të afrojë dhe talentin e Dortmund, Jude Bellingham në ekip. Tekniku spanjoll është i vendosur të krijojë një mesfushë me talente të reja, teksa e ardhmja e Ilkay Gundogan dhe Bernardo Silva mbetet e paqartë. Guardiola kërkon t’i mbajë të dy lojtarët në ekip sezonin e ardhshëm, por e di se ky mund të jetë një mision i vështirë, prandaj kërkon të ketë opsione të tjera në dispozicion.
Mac Allister, i cili është vetëm 24 vjeç, duket opsioni perfekt në planin afatgjatë. Pavarësisht se lojtari aktivizohet si mesfushor, ai ka shënuar 7 gola në të gjitha kompeticionet për Brighton këtë sezon. Mac Allister luajti në të gjitha ndeshjet e Argjentinës në Kupën e Botës, duke kontribuar në suksesin historik të përfaqësueses.
Megjithëse lojtari nuk ka shprehur asnjëherë dëshirën konkrete për t’u larguar nga Amex Stadium, kjo nuk do të ndalojë City për të bërë një ofertë zyrtare për kartonin e tij në verë. Mesfushori ka një kontratë aktive me Brighton deri në vitin 2025, me opsionin për rinovim dhe një vit ekstra. Gjithsesi, duket se klubi nuk do të pengojë lojtarin të largohet nëse ai shpreh këtë dëshirë.