Manchester City ka konfirmuar afrimin e Kalvin Phillips nga Leeds United për shifrën e 45 milionë paundëve. Mesfushori anglez ka firmosur një kontratë 6 vjeçare me kampionët në fuqi të Anglisë. Ky ishte afrimi i tretë në këtë merkato për ekipin e Pep Guardiolës, pas Erling Haaland dhe Stefan Ortega Moreno.
Phillips u shpreh mjaft entuziast për aventurën e re që e pret në Etihad:
“Jam shumë i kënaqur që i jam bashkuar Manchester City, që ka provuar dhe një herë se është skuadra më e mirë në Angli. City ka një ekip fantastik dhe një tranjer si Pep Guardiola, që konsiderohet me të drejtë më i miri në botë. Të jesh në gjendje të luash nën drejtimin e Pep dhe stafit të tij është diçka për të cilën jam shumë i emocionuar.”
Phillips bëri debutimin e tij me kombëtaren angleze në vitin 2020. Gjatë Europianit të shtyrë për vitin 2021 ai luajti të gjitha ndeshjet e mundshme dhe u shpall lojtari i vitit në kombëtaren e “3 Luanëve”. Gjatë sezonit 2019-2020, Phillips luajti 37 ndeshje nën drejtimin e trajnerit Marcelo Bielsa. Mesfushori ishte një nga figurat kyçe që kontribuoi në ngjitjen e Leeds United në Premier League.
Drejtori sportiv i Manchester City, Txiki Begiristain, gjithashtu dha komentin e tij mbi afrimin e Kalvin Phillips në Etihad:
“Leximi që ai i bën lojës, së bashku me aftësitë në pasim, energjinë dhe dëshirën, e bëjnë atë një talent të jashtëzakonshëm. Ai është një lojtar me një dëshirë fantastike për të fituar. Besojmë se Phillips do të jetë një shtesë fantastike për ekipin tonë dhe do të kompletojë lojën në mënyrë perfekte.”
Lojtari u kujdes që të falenderonte tifozët, trajnerin dhe klubin e Leeds United në prag të largimit. Sipas Phillips, vendimi për t’u larguar drejt Manchester City është i rëndësishëm në rrugën për të ndjekur ëndrrat e tij.
