Drejtuesit e Manchester United janë duke avancuar interesimin e tyre për bomberin e Napoli, Victor Osimhen. “Djajtë e Kuq” dërguan agjentët e tyre për të parë Osimhen në aksion, në sfidën ndaj Milan në Champions League. Megjithëse napoletanët u eleminuan nga kuqezinjtë, kjo nuk ka ndikuar aspak tek interesi i anglezëve për sulmuesin e talentuar nigerian.
Në fakt, Osimhen ia doli të gjente rrugën e rrjetës, duke regjistruar tashmë plot 26 gola në 31 paraqitje gjatë këtij sezoni. Napoli ende nuk ka hapur bisedimet me lojtarin për një kontratë të re, teksa duket qartësisht se klubi ka pranuar tashmë faktin se nigeriani do të largohet së shpejti nga Napoli. Kujtojmë se sulmuesi ka dhe 2 vite aktive me italianët sipas kontratës së tij aktuale. Lojtari iu bashkua Napolit në vitin 2020 nga francezët e Lille, për shifrën e 70 milionë eurove, rekord financiar për klubin italian.
United nga ana tjetër e sheh Osimhen si një alternativë serioze për merkaton e verës. Megjithatë, “Djajtë e Kuq” po ndjekin gjithashtu dhe pistën Harry Kane. Kapiteni i kombëtares angleze pritet të refuzojë dhe një herë rinovimin e kontratës me Tottenham, dhe kjo mund të shtyjë klubin londinez që të shesë shërbimet e lojtarit. Në të kundërt, Kane mund të largohet me kosto zero një vit më vonë, gjë që do të rezultonte një humbje mjaft e madhe ekonomike për Tottenham.
Kane është një emër që garanton gola, teksa sulmuesi e ka provuar veten në Premier League prej kohësh. Megjithatë, Kane është tashmë 31 vjeç dhe po hyn në vitet finale të karrierës së tij. Osimhen ndërkohë është vetëm 24 vjeç dhe paraqet një opsion më të sigurt, të qëndrueshëm dhe afatgjatë, për të mbështetur vizionin e Manchester United. Kjo është dhe arsyeja se përse “Djajtë e Kuq” do të përpiqen deri në fund për të siguruar shërbimet e asit të Napoli.