Sipas raportimeve të fundit në mediat angleze, Manchester United dhe Chelsea mund të vihen shumë shpejt në një garë të ashpër me njëri-tjetrin, për kartonin e Denzel Dumfries. Hollandezi është pjesë e Inter në Itali që prej vitit 2021, por lajmet për një lëvizje të tij drejt Premier League nuk kanë rreshtur asnjëherë së pushuari.
Chelsea është në kërkim të një lojtari që mund të luajë në pozicionin e Reece James, i cili ka vuajtur shumë dëmtime gjatë sezoneve të fundit. James është momentalisht i dëmtuar dhe pritet të jetë jashtë fushave të blerta për të paktën 1 muaj. Nga ana tjetër, United gjithashtu kërkon alternativa më solide në prapavijë. Trajneri Ten Hag nuk është i kënaqur me Aaron Wan-Bissaka, ndërkohë që Diogo Dalot i skadon kontrata vitin e ardhshëm.
Inter mendohet se kërkon të përfitojë rreth 50-60 milionë euro për kartonin e Dumfries, një shifër kjo e pranueshme për të dy gjigandët e Premier League. Megjithatë, në garën për shërbimet e hollandezit ekziston dhe një tjetër rival. Bëhet fjalë pikërisht për Tottenham, që ka një avantazh krahasuar me rivalët.
Ekipi i Antonio Conte është i gatshëm të përfshijë në marrëveshje dhe kartonin e Emerson Royal. Ky i fundit do të ishte një zëvëndësues direkt i Dumfries dhe Inter mendohet se i pëlqen ky propozim. Sidomos duke marrë parasysh faktin se Emerson është aktivizuar rregullisht me Tottenham këtë sezon.
Bayern Munich gjithashtu është i interesuar për mbrojtësin hollandez, dhe bavarezët janë të gatshëm të ofrojnë dhe kartonin e Noussair Mazraoui për të arritur në një marrëveshje. Gjithsesi, gjermanët nuk janë aq të fokusuar tek Dumfries sa kundërshtarët e tyre në Premier League.
Vet mbrojtësi mendohet se preferon një lëvizje drejt Premier League, por ekipi i preferuar është ende një mister.
