Jarrad Branthwaite është emri i mbrojtësit të Everton, që ka kapur së fundmi vëmendjen e Manchester United, Liverpool, por dhe italianëve të Romës. Lojtari aktivizohet për momentin si i huazuar tek PSV Eindhoven, dhe ka impresionuar me formën e tij gjatë këtij sezoni, nën drejtimin e trajnerit Ruud van Nistelrooy.
Pavarësisht se klubi hollandez ka bërë 2 oferta zyrtare për kartonin e Branthwaite, e fundita në shifrat e 15 milionë paundëve, Everton i ka refuzuar ato, pasi beson se mbrojtësi vlen shumë më shumë. Lojtari ka zhvilluar 17 paraqitje me PSV këtë sezon, duke shënuar gol në një fitore të rëndësishme 4-3 ndaj Feyenoord.
Mbrojtësi do të përballet me një test të vështirë javën e ardhshme, teksa PSV do të përballet me Sevilla në Europa League, kompeticion ku spanjollët mund të konsiderohen specialistë. Agjentë të United dhe Liverpool pritet të jenë të pranishëm në këtë sfidë, për të ndjekur nga afër progresin e Branthwaite.
Everton për momentin ka shumë qendër-mbrojtës në ekip, dhe nuk ka ndërmend të kërkojë rikthimin e lojtarit në Angli. Drejtuesit e klubit janë të idesë se sa më shumë kohë që Jarrad kalon në Hollandë, aq më shumë do të rritet vlera e kartonit të tij, duke qënë se mbrojtësi po kalon një moment mjaft të mirë me PSV.
Gjithsesi, shumë gjëra do të varen dhe nga pozitat e Everton në fund të sezonit. Anglezët janë ende të rrezikuar për të rënë nga kategoria, dhe afrimi i trajnerit të ri Sean Dyche, nuk është një biletë e sigurt për qëndrimin në Premier League. Branthwaite ka luajtur vetëm 13 takime me ekipin e parë të Everton, por ka shfaqur në shumë momente talentin e tij. Mbetet të shohim se cili do të jetë fati i lojtarit në fund të sezonit.
