Manchester United është gati të thyejë rekordin për transferimin më të shtrenjtë në histori, për të sjellë në Old Trafford talentin e West Ham, Declan Rice. Lojtari ka fituar statusin si një nga mesfushorët e rinj më të mirë në Europë, dhe është lokomotiva e West Ham, që këtë sezon garon për një vend mes 4 më të mirëve të Premier League.
Sipas prestigjozes 90min, Rice dhe përfaqësuesit e tij ia kanë bërë të qartë klubit se ky vit është momenti i duhur që mesfushori të hedhë hapin e rradhës në karrierën e tij. West Ham e di se misioni për të rinovuar me Rice është gati i pamundur, duke qënë se lojtari mund të sigurojë një pagë prej të paktën 250,000 paundësh në javë diku tjetër. Kjo shifër është përtej limiteve të klubit ku ai aktivizohet momentalisht.
Trajneri i West Ham, David Moyes, sugjeroi javën e kaluar se çdo ekip që interesohet për Declan Rice do të duhet të paguajë 150 milionë paundë për shërbimet e tij. Por burime më pranë klubit, kanë konfirmuar se presidenti David Sullivan është i gatshëm të heqë dorë nga aseti i tij më i çmuar për 120 milionë paundë.
Kjo është një shifër tejet e lartë por jo aq sa të trembë United, që mund të vijë me një ofertë zyrtare në verë. Me largimin e mundshëm të Pogba në fund të sezonit, të besuarit e Ralf Rangnick do të kenë vërtet shumë nevojë për një mesfushor të të njejtit kalibër, dhe Rice duket e vetmja alternativë për momentin.
Në të njejtën kohë, rivalët e Manchester City dhe Chelsea gjithashtu interesohen për kartonin e mesfushorit anglez. Presioni i kundërshtarëve mund të shërbejë si një tjetër shtysë që United të paguajë shifrën rekord, për të sjellë Declan Rice në Old Trafford.
