Sipas ESPN, Manchester United kryeson garën për të siguruar kartonin e mesfushorit të West Ham, Declan Rice. Megjithatë, është ende e paqartë nëse vet lojtari dëshiron një transferim në Old Trafford. “Djajtë e Kuq” janë ende një nga klubet më mëdha në botë, por vitet e fundit kanë rezultuar një periudhë dështimesh, teksa klubi sipas të gjitha gjasave nuk do të luajë në Champions League sezonin e ardhshëm.
Kjo është arsyeja se përse Rice mund të mendojë se transferimi te United mund të dëmtojë karrierën e tij. Trajneri i West Ham, David Moyes tha muajin e kaluar se nuk dëshiron që mesfushori të largohet. Por tekniku gjithsesi pranoi natyrën e paparashikueshme të futbollit, duke krahasuar rastin e Rice, me largimin e Wayne Rooney nga Everton në vitin 2004:
“Mendoja se Wayne ishte i pazëvëndësueshëm, por në futboll duhet të ecësh përpara…”
Rio Ferdinand, Frank Lampard, Joe Cole dhe Michael Carrick janë të gjithë personazhe që e nisën karrierën e tyre me West Ham, dhe më vonë u larguan drejt klubeve më të mëdha, për të shijuar suksese dhe trofe. Por Rice mund të jetë i prirur të presë për një ofertë më tërheqëse, nga një tjetër klub në Premier League.
Megjithatë, rivalët e United duket se kanë prioritete të tjera. Manchester City duhet të bëjë kujdes me financat pasi Erling Haaland mbetet objektivi numër 1 në verë. Chelsea nga ana tjetër duhet të gjejë zëvëndësuesin e Antonio Rudiger, i cili kushdo qoftë, do t’i kushtojë jo pak bluve të Londrës. Ndërkohë Liverpool ka nevojë për mesfushorë të rinj, por burime pranë klubit bëjnë me dije se “The Reds” janë të prirur të kërkojnë për opsione më pak të kushtueshme sesa Rice.
Kjo i jep United avantazhin në garën për Rice, dhe trajneri Erik ten Hag ka detyrën të bindë talentin e West Ham që t’i bashkohet klubit.
