Trajneri i Manchester United, Erik ten Hag, po përballet me një dilemë të rëndësishme lidhur me merkaton e verës. “Djajtë e Kuq” kanë gati plot 100 milionë paundë për një sulmues të ri, dhe dy emrat kryesorë që mund të luajnë në Old Trafford sezonin e ardhshëm janë Harry Kane dhe Victor Osimhen i Napoli. Tashmë që të dyja alternativat duken misione të arritshme, i takon Ten Hag të peshojë opsionet, për të përcaktuar se cili lojtar i përshtatet më shumë vizionit të tij për United.
Burime pranë klubit bëjnë me dije se megjithëse Harry Kane e ka provuar veten e tij në Premier League prej disa sezonesh, Victor Osimhen i përshtatet më shumë asaj që tekniku hollandez do të krijojë tek United. Përveç aftësisë për të shënuar gola, lojtari i Napoli është i shpejtë, fizikisht superior dhe mjaft agresiv në presing. Të gjitha këto atribute i përshtaten mjaft mirë stilit të lojës të Ten Hag.
Ky i fundit ka ndjekur sulmuesin e Napoli që prej verës së kaluar, dhe megjithëse ekzistojnë disa dyshime në lidhje me dëmtimet e tij, Osimhen mendohet të jetë në krye të listës së trajnerit të United përsa i përket sulmit.
Gjithsesi, presidenti i Napoli, Aurelio De Laurentiis nuk pritet të heqë dorë lehtë prej nigerianit, teksa Chelsea dhe Paris Saint-Germain gjithashtu janë të interesuara për shërbimet e tij. Por dhe transferimi i Harry Kane nuk është një mision i lehtë, teksa presidenti i Tottenham, Daniel Levy, nuk preferon që lojtari të bëhet pjesë e një ekipi në Premier League.
Megjithatë, Levy mund të jetë i detyruar të “lëshojë pe”, duke qënë se sezonin e ardhshëm, Kane do të hyjë në vitin e fundit të kontratës së tij aktuale me klubin. Thënë këtë, Tottenham nuk mund të rrezikojë të humbasë Kane me kosto zero, dhe kjo avantazhon United, në rast se “Djajtë e Kuq” vendosin të fokusohen tek bomber anglez.
