Manchester United është ende në kërkim të një sulmuesi! “Djajtë e Kuq” po monitorojnë situatën teksa sipas burimeve të ESPN, drejtuesit e klubit nuk janë më të interesuar për Marko Arnautovic të Bologna. Anglezët ishin në bisedime me klubin italian për arritjen e një marrëveshjeje por kërkesat e këtyre të fundit duket se kanë qënë të papranueshme për United.
Anglezët gjithashtu janë ndikuar në vendimin e tyre nga incidenti i Arnautovic në ndeshjen mes Maqedonisë së Veriut dhe Austrisë. Gjatë këtij takimi sulmuesi përdori gjuhë raciste ndaj tifozëve kundërshtarë dhe u ndëshkua për pasojë nga UEFA. Futbollisti kërkoi më pas ndjesë për gjestin duke insistuar se asgjë nuk ishte e qëllimtë.
Trajneri i United, Erik ten Hag, ka punuar me Arnautovic në kohën që menaxhonte skuadrën e FC Twente, por duket se hollandezi duhet të mendojë tashmë për alternativa të tjera. Një tjetër emër i përfolur së fundmi është ai i Alvaro Morata. 29 vjeçari ka vetëm 1 vit kontratë të mbetur me Atletico Madrid, dhe ka luajtur për 2 vitet e fundit si i huazuar tek Juventus.
Ten Hag ndërkohë kërkon një sulmues fizikisht të fortë duke qënë se sulmi i United për këtë sezon të ri ka shumë pikëpyetje. Martial është momentalisht i dëmtuar, dhe vjen në ekip pas një aventure tek Sevilla në formë huazimi, ku gjërat nuk shkuan si duhet. Kjo ka vënë në pikëpyetje aftësitë e francezit për të përballur nivelin e lartë të Premier League.
Cristiano Ronaldo ndërkohë ende nuk është në formën e tij optimale, duke qënë se humbi pjesën më të madhe të ndeshjeve para-sezonale për arsye personale. E ardhmja e portugezit në Old Trafford është gjithashtu e paqartë, teksa CR7 ka përsëritur disa herë kërkesën për t’u larguar drejt një klubi që i ofron mundësinë të luajë në Champions League.
