Manchester United është vënë në ndjekje të talentit portugez Joao Felix, por Atletico Madrid duket se po ia vështirëson punën “Djajëve të Kuq”. Spanjollët kërkojnë akordin për një marrëveshje në formë huazimi deri në fund të sezonit për 9.5 milionë paundë, dhe më pas një garanci nga United për të blerë përfundimisht kartonin e Felix. Atletico Madrid e vlerëson lojtarin në shifrat e 70.5 milionë paundëve.
Sulmuesi është lënë i lirë të largohet nga Wanda Metropolitano, duke qënë se nuk është më në planet e trajnerit Diego Simeone. Kjo për shkak se Felix ka dështuar të performojë me konsistencë që prej transferimit të tij nga Benfica në klubin madrilen.
United është momentalisht një nga klubet që udhëheq garën për kartonin e lojtarit. Trajneri Erik ten Hag ka nevojë për përforcime në sulm, sidomos pas largimit të Cristiano Ronaldos. Mediat angleze bëjnë me dije se drejtuesit e United janë takuar me CEO-n e Atletico, Miguel Angel Gil, për të diskutuar një marrëveshje, por spanjollët kanë refuzuar ofertën e parë të “Djajëve të Kuq” prej 3 milionë paundësh për huazimin e Felix.
Atletico i ka dhënë afat anglezëve deri në mes të javës për të ardhur me një ofertë të re, dhe mendohet se spanjollët po ushtrojnë presion duke qënë se ka dhe klube të tjera që interesohen për kartonin e Felix. Mes tyre është Arsenal, që ishte afër firmosjes me portugezin verën e kaluar. Londinezët pritet të vijnë me ofertën e tyre shumë shpejt, dhe United do të ketë 48 orë kohë për t’u përgjigjur me një kundër-ofertë.
Felix ia doli të shënonte në ndeshjen e fundit të Atletico në La Liga përballë Elche. Megjithatë, ende nuk është e sigurt nëse trajneri Simeone do të përzgjedhë sulmuesin për sfidën e rëndësishme ndaj Barcelonës ditën e hënë.
