Manchester United po bën gati një ofertë konkrete për Harry Kane, dhe duket se “Djajtë e Kuq” janë të gatshëm të luftojnë me ekipet e tjera rivale, për të siguruar kartonin e bomberit anglez. Bayern Munich, Barcelona dhe Chelsea janë gjithashtu në ndjekje të lojtarit të Tottenham, por United duket se ka hedhur hapa konkretë për të siguruar firmën e tij.
Ekipi anglez do të ofrojë 80 milionë paundë për kartonin e Kane, dhe drejtuesit e United kanë shpresë se mund të konkludojnë një marrëveshje në javët e ardhshme. Për trajnerin Ten Hag, Kane është kthyer në objektivin numër 1 në repartin ofensiv, kjo nisur dhe nga fakti se alternativa tjetër, që është bomber nigerian i Napoli, Victor Osimhen, është një shënjestër më e vështirë.
Tekniku hollandez gjithashtu beson se me Kane në ekip, United ka shanse reale për të konkurruar për titullin kampion në Premier League sezonin e ardhshëm. Kjo përkon dhe me dëshirën më të madhe të vet sulmuesit, i cili kërkon të fitojë trofe, objektiv që ka rezultuar mjaft i vështirë me Tottenham. Kane ishte shumë pranë largimit nga klubi londinez në startin e këtij sezoni por pas insistimit të presidentit Levy, bomberi anglez u bind të qëndronte.
Levy po punon për të gjetur zëvëndësuesin e trajnerit Conte, i cili u largua me konsensus nga drejtimi i Tottenham. Presidenti i klubit londinez shpreson që tekniku i ardhshëm i spursave të bindë Harry Kane që të qëndrojë edhe sezonin e ardhshëm, por lojtari pritet të kërkojë përsëri largimin.
Përsa i përket preferencave personale, Kane gjithashtu mendohet se preferon United mes klubeve të tjera që interesohen për kartonin e tij. Ndërkohë një transferim jashtë Anglisë ka më pak gjasa të ndodhë duke qënë se anglezi është mjaft i lumtur në Premier League.