Erik ten Hag është shumë pranë konfirmimit si trajneri i ri i Manchester United. Drejtuesit e klubit ende nuk kanë bërë zyrtar lajmin, por mediat hollandeze kanë bërë me dije se tashmë ekziston një marrëveshje mes teknikut të Ajax dhe “Djajëve të Kuq”. Ten Hag pritet të zëvëndësojë trajnerin e përkohshëm Ralf Rangnick, në fund të sezonit.
Konfirmimi i Ten Hag pritet të ndodhë pas finales së kupës në Hollandë, mes Ajax dhe PSV Eindhoven ditën e diel. Ajax kryeson kampionatin me 4 pikë diferencë nga kundërshtarët më të afërt, pikërisht PSV. Ndërkohë në Champions League, kampionët e Hollandës u eleminuan në mënyrë disi surprizë nga Benfica.
Ten Hag pritet të firmosë një kontratë 3 vjeçare me “Djajtë e Kuq”, me opsionin për të rinovuar dhe për 1 vit tjetër shtesë. Zbarkimi i tij në Old Trafford do të pritet si lajm pozitiv nga fansat e klubit, të cilët prej kohësh kanë kërkuar një teknik me një projekt dhe vizion afatgjatë të qartë për klubin.
Por hollandezin e pret një sfidë e madhe në Manchester. Klubi ka shumë pak shanse që të kualifikohet në Champions League sezonin e ardhshëm, dhe dështimi në këtë objektiv madhor nuk është pritur mirë nga shumë lojtarë të ekipit. Kjo verë sipas të gjitha gjasave do të shoqërohet me largime të shumta nga “Djajtë e Kuq”. Disa prej emrave më të përmendur për t’u larguar nga Old Trafford janë: Paul Pogba, Jesse Lingard, Cristiano Ronaldo dhe Marcus Rashford.
Gjithsesi, filozofia e Ten Hag pritet të sjellë ndryshime të mëdha tek United, duke qënë se hollandezi ka modulin e tij të veçantë të lojës, në krahasim me trajnerët e tjerë. Buxheti gjithashtu nuk do të jetë problem, teksa përfaqësuesit e teknikut të Ajax mësohet se kanë diskutuar dhe mbi këtë pjesë, me drejtuesit e United.