Anglezët e Liverpool janë linkuar prej kohësh me emrin e Kylian Mbappe, dhe pavarësisht konkurrencës nga Real Madrid, “The Reds” mund të kenë ende një shans për të sjellë superstarin francez në Anfield. Fituesit të Kupës së Botës i skadon kontrata aktuale me PSG në fund të sezonit.
Drejtuesit parizienë refuzuan një shumë prej 137 milionë paundësh nga Real Madrid, për kartonin e Mbappe gjatë verës së kaluar. Liverpool nga ana tjetër ka vite që monitoron Mbappe në distance, madje prej shumë më shumë kohësh se ekipet e tjera. Megjithatë, afrimi i Luis Diaz duket se zbehu disi interesin për Mbappe, duke qënë se Klopp solli një tjetër sulmues në ekip. Pavarësisht këtij fakti, sulmuesi kryesor i Liverpool, Mohamed Salah, nuk do të luajë dhe për shumë gjatë me “The Reds”, edhe nëse firmos një kontratë të re. Kjo mund të hapë një dritare për Mbappe, që mund të jetë zëvëndësuesi perfekt i tij në planin afatgjatë.
Vet francezi ka përsëritur disa herë se e ardhmja është ende e paqartë për të. Këtë e ka thënë dhe në intervistën e fundit në fundjavë:
“Ka disa faktorë të cilët duhen marrë parasysh…Siç e kam thënë, nuk është një vendim i lehtë. Do mundohem të ndërmarr atë më të mirin, për mua dhe personat rreth meje.”
I pyetur nëse ende konsideron të qëndrojë tek PSG, Mbappe u përgjigj pozitivisht, duke pranuar se çdo gjë mund të ndodhë.
Shumë analistë sportivë janë të bindur se një lëvizje drejt Premier League do të ishte zgjedhja më e mirë për Mbappe, i cili mund të realizojë ëndrrën e tij për t’iu bashkuar Real Madrid, në një moment të dytë. Jurgen Klopp shihet si një nga trajnerët më të mirë në botë, sidomos në menaxhimin dhe orientimin e duhur të talenteve të reja, dhe kjo është pikërisht ajo çka i duhet Kylian në këtë pikë.