Italianët e Milan kanë arritur më në fund një marrëveshje me talentin e Club Brugge, Charles De Ketelaere. Kuqezinjtë kanë qënë në ndjekje të sulmuesit gjatë gjithë verës, teksa nuk ka munguar dhe interesimi nga klube të Premier League si Leicester City apo Leeds. Megjithatë, duket se De Ketelaere ka zgjedhur Milan, duke marrë parasysh dhe faktin se italianët do të luajnë në Champions League sezonin e ardhshëm.
Sipas prestigjozes 90min, termat personale të kontratës mes lojtarit dhe klubit të ri janë dakordësuar prej kohësh. Megjithatë, negociatat mes Milan dhe Club Brugge patën stopuar për shkaqe financiare. Drejtori sportiv i Milan, Paolo Maldini, udhëtoi para pak kohësh drejt Belgjikës, për të arritur në një marrëveshje për shërbimet e sulmuesit. Por kjo tentativë nuk rezultoi e suksesshme në atë kohë.
Megjithatë, klubet kanë arritur më në fund akordin dhe Milan pritet t’i paguajë belgëve 31 milionë euro për shërbimet e Charles De Ketelaere. Përveç shumës fillestare, kuqezinjtë do të paguajnë dhe 4 milionë euro në bonuse. Sulmuesi i talentuar do t’i nënshtrohet shumë shpejt një ekazminimi mjekësor rutinë, përpara se të prezantohet zyrtarisht si lojtar i Milan.
De Ketelaere është afrimi i katërt për Milan në këtë merkato vere. Junior Messias dhe Alessandro Florenzi luanin si të huazuar gjatë sezonit që lamë pas, por tashmë do të lidhin një kontratë të rregullt me kuqezinjtë. Kampionët në fuqi të Serie A gjithashtu firmosën me Divock Origi, i cili erdhi në San Siro me kosto zero nga Liverpool.
Ndërkohë Milan është linkuar dhe me emra të tjerë interesantë si Hakim Ziyech i Chelsea. Ky i fundit duket se e ka humbur rolin e titullarit në ekipin e Tuchel, dhe është i prirur të kërkojë një aventurë të re diku tjetër. Megjithatë, klubet ende nuk janë përfshirë në bisedime zyrtare.
