Teksa kontrata e tij me Liverpool do të skadojë shumë shpejt në fund të muajit, Mohamed Salah duket se po konsideron seriozisht largimin nga “The Reds”. Përpara pak javësh u raportua se egjiptiani i ka komunikuar miqëve të tij të ngushtë se është i gatshëm të qëndrojë përsëri tek Liverpool, por gjërat kanë ndryshuar shumë shpejt së fundmi. Gjithçka lidhet me interesimin e spanjollëve të Barcelonës, të cilët sipas mediave angleze i kanë ofruar një vend të sigurt në ekip sulmuesit të talentuar.
Negociatat për një rinovim kontrate me Liverpool kanë ngecur që verën e kaluar, por situata nuk bëri shumë bujë duke marrë parasysh kontekstin e kohës. Por qershori erdhi shumë shpejt dhe Liverpool ende nuk bie dakord për kërkesat financiare të lojtarit. Ky i fundit është i mendimit se paga e tij aktuale tek “The Reds” nuk është mjaftueshëm duke marrë parasysh nivelin e performancave që Salah ka prodhuar këtë sezon. Drejtuesit e klubit ndërkohë hezitojnë të prishin strukturën e pagave të ekipit, por shpresojnë ende të gjejnë një rrugë të mesme. Situata bëhet akoma më e komplikuar duke marrë parasysh se futbollisti mund të largohet shumë lehtë me kosto zero, gjë që do të përbënte një humbje të madhe për klubin anglez.
Drejtuesit e Liverpool shpresojnë që rinovimi i trajnerit Klopp deri në vitin 2026 me ekipin, të shërbejë si faktor shtesë për të bindur Salah të qëndrojë në Anfield. E njejta gjë vlen dhe për Sadio Mane, që gjendet në ekzaktësisht të njejtin pozicion si egjiptiani. Por Klopp nuk mendon se vendimi i tij do të ketë ndikim. Gjermani tha:
“Kjo është më shumë një çështje që u takon djemëve (Salah dhe Mane). Marrëdhënia ime me ta është fantastike… Nëse është një shenjë pozitive në rregull, por nuk mendoj se ky do të jetë faktori deçiziv, për cilindo vendim që ata marrin.”