Sipas raportimeve të Mundo Deportivo, Barcelona është e interesuar për kartonin e sulmuesit të Liverpool, Sadio Mane. Drejtuesit katalanas kanë kuptuar se Mane është i joshur nga ideja e të luajturit futboll në La Liga, dhe kjo mund të rrisë shanset që Barcelona të sjellë në Camp Nou senegalezin gjatë merkatos së verës.
30 vjeçari ka konsoliduar veten si një nga lojtarët më të rëndësishëm në ekipin e Jurgen Klopp, por pavarësisht këtij fakti, ende nuk ka asnjë përpjekje nga ana e Liverpool për t’i ofruar Mane një rinovim kontrate. Marrëveshja e tij aktuale me “The Reds” skadon vitin e ardhshëm dhe drejtuesit e klubit duhet të tregohen të kujdesshëm, nëse nuk duan të humbasin me kosto zero shërbimet e Mane.
Ky i fundit beson se në La Liga ka më shumë shanse për të fituar trofeun prestigjoz të “Topit të Artë”, sesa tek Liverpool. Trajneri i Barcelonës, Xavi, mendohet se është shumë pro afrimit të Mane sezonin e ardhshëm. Tekniku spanjoll i ka bërë të qartë drejtuesëve të klubit se afrimet e reja janë të domosdoshme nëse blaugranat duan të konkurrojnë me Real Madrid për titullin kampion. Mediat spanjolle bëjnë me dije se Barcelona është e gatshme të largojë 9 lojtarë në verë, duke përfshirë këtu Frenkie de Jong dhe Memphis Depay. E gjitha kjo për të përforcuar ekipin me lojtarë të kalibrit të Mane apo Salah.
Edhe ky i fundit është në radarin e drejtuesëve të klubit katalanas, por një lëvizje për të është shumë më e komplikuar. Shkak kryesor janë pretendimet e larta që egjiptiani ka për pagën, të cilat janë shumë të vështira të përballohen nga Barcelona. Mane ndërkohë është një opsion shumë më i arritshëm, por spanjollët mund të jenë të detyruar të garojnë me Bayern për shërbimet e lojtarit. Kjo pasi bavarezët gjithashtu kanë shprehur interesin e tyre, duke komunikuar madje me agjentin e Mane.