Paul Pogba është një nga objektivat e Juventus për merkaton e verës. Lajmi është bërë i ditur nga italianja CalcioMercato, që ka zbuluar se “Zonja e Vjetër” është në kontakte me agjentin e mesfushorit, Mino Raiola. Pogba i skadon kontrata me Manchester United në fund të sezonit dhe bisedimet për një rinovim me “Djajtë e Kuq” duket se janë ndalur.
Kjo është një shtysë më shumë për Juventus, që ka kërkuar prej shumë kohësh tashmë, një rikthim të francezit në Torino. Mediat italiane bëjnë me dije se Pogba gjithashtu i pëlqen ideja e rikthimit në Itali, por ky do të jetë një operacion mjaft i vështirë për Juventus.
Arsyeja e parë është konkurrenca. Mesfushori është prej kohësh objektiv i Real Madrid dhe Paris Saint-Germain, që ende nuk kanë hequr dorë prej tij. Dy gjigandët e Europës gjithashtu kanë kapacitet më të fortë financiar sesa Juventus, në rast se gara për kartonin e tij do të vendoset tërësisht nga aspekti monetar.
Nga ana tjetër, përveç kostos së transferimit, paga e lojtarit është gjithashtu një problem madhor për Juventus. Në bazë të kontratës së tij aktuale me Unted, Pogba fiton plot 15 milionë euro neto në sezon. Kjo shifër është totalisht e papërballueshme për Juventus. Duke thënë këtë, edhe nëse drejtuesit juventinë arrijnë akordin me Manchester United për shërbimet e francezit, ky i fundit duhet të pranojë një ulje page nëse dëshiron të luajë përsëri në Itali.
Trajneri Massimiliano Allegri është një adhurues i madh i Pogba. Tekniku italian ka trajnuar mesfushorin për dy sezone te Juventus, duke fituar 2 herë titullin kampion të Serie A. Duke thënë këtë, Massimiliano ka plotësisht të drejtë të besojë se një bashkëpunim i dytë mes francezit dhe tij do të sillte përsëri sukses për Juventus, por gjithçka mbetet për tu parë.