Sipas raportimeve të ESPN, francezët PSG i kanë bërë një tjetër ofertë Manchester United, për shërbimet e mesfushorit Paul Pogba. Shuma e ofruar mendohet se është disi më e ulët se propozimi që “Djajtë e Kuq” i kanë bërë Pogba për rinovim. Megjithatë, kjo gjë duket se nuk e bezdis lojtarin, i cili ka vendosur të largohet nga Old Trafford.
Mesfushori është i prirur të konsiderojë ofertën e parizienëve, por e tërheq më shumë një rikthim tek Juventus. Ndërkohë interesi i Real Madrid për Pogba ka rënë ndjeshëm që prej largimit të trajnerit Zidane nga drejtimi i galaktikëve. Javën e kaluar futbollisti u shpreh se ende nuk ka marrë një vendim përfundimtar për të ardhmen e tij. Ai tha:
“Asgjë nuk është e vendosur mbi të ardhmen time, asgjë nuk është e përfunduar. Mund të vendos nesër ose gjatë merkatos. Fillimisht duhet të përfundoj sezonin në mënyrën më të mirë të mundshme. Sezoni nuk ka mbaruar ende, por nuk kemi më mundësi për të fituar tituj. Dua të fitoj trofe, të luaj për diçka dhe vitet e fundit nuk ia kemi dalë. Është për të ardhur keq!”
Pogba fiton 290,000 paundë në javë tek United, por financat nuk janë problemi kryesor në rastin e transferimit drejt PSG. Djali i madh i futbollistit, Labile Shakur, do të nisë shkollën vitin e ardhshëm, ndërsa gruaja e Pogba, Zulay, punon në industrinë e dizajnit në Cheshire. Burime pranë dhomave të zhveshjes tek United janë të bindur se mesfushori do të largohet në fund të sezonit, por francezi ende nuk është i sigurt se cili është opsioni më i mirë për familjen e tij.
Lojtari ishte shumë pranë largimit në verën e vitit 2019, por United nuk arriti të merrte një ofertë bindëse për kartonin e tij.