Francezët e PSG janë duke përgatitur një ofertë astronomike, për të sjellë në Paris mesfushorin e Manchester United, Paul Pogba. Lojtari është ende i pavendosur mbi të ardhmen e tij, dhe rinovimi me “Djajtë e Kuq” është ende një opsion. Megjithatë, PSG nuk ka ndërmend të demotivohet nga ky fakt.
Francezi është i lirë të firmosë një para-kontratë me një klub të ri, por ende nuk ka ndërmarrë një hap të tillë. Pogba po përqëndrohet tek rikuperimi nga një dëmtim në kofshë dhe progresi i lojtarit ka qënë mjaft pozitiv. Mesfushorit i skadon kontrata në fund të vitit, pra mund t’i bashkohet çdo klubi me kosto zero në verë. Por paga e tij sipas të gjitha gjasave do të jetë shumë e lartë dhe kjo pritet të kompensojë koston zero të një transferimi të mundshëm.
Mesfushori iu rikthye fushave të blerta në fillim të muajit dhe me shumë mundësi do të jetë lojtar kyç për United nga ky moment, e deri në përfundim të sezonit. “Djajtë e Kuq” kanë një objektiv të vështirë që është mbylla e kampionatit në top-katërshen e parë dhe Pogba nuk dëshiron që të shpërqëndrohet nga ky objektiv.
Përveç PSG, Juventus, Barcelona dhe Real Madrid gjithashtu janë të interesuar për francezin. Në Spanjë interesimi i Real Madrid duket më konkret. Madrilenët përfliten prej kohësh për një transferim të Pogba në Santiago Bernabeu, teksa profili i lojtarit i përshtatet mjaft mirë galaktikëve. Duke qënë se Modric dhe Kroos janë në vitet e fundit të karrierës së tyre, madrilenët kanë nevojë për lidera të rinj në mesfushë. Pogba ka dëshmuar me kombëtaren franceze se është i aftë ta ndërmarrë këtë përgjegjësi.
Gjithsesi, oferta e PSG mendohet të jetë më e lartë se ajo e çdo rivali tjetër në Europë, dhe ky është një faktor që megjithëse jo më i rëndësishmi, nuk mund të neglizhohet nga Pogba.
