Sipas prestigjozes Marca në Spanjë, drejtuesit e PSG duan t’i ofrojnë Lionel Messit një rinovim kontrate. Burimet pranë klubit bëjnë me dije se parizienët kanë në mendje rinovimin për 1 vit ekstra, por ende nuk është i qartë qëndrimi i yllit argjentinas.
Në të kaluarën, shumë media sportive raportuan se ekziston një klauzolë në kontratën aktuale mes lojtarit dhe klubit, që lejon palët të zgjasin bashkëpunimin e tyre. Por kjo rezultoi të ishte jo e vertetë. 6 herë fituesit të Topit të Artë ende nuk i është paraqitur një propozim konkret, megjithatë kjo pritet të ndodhë shumë shpejt.
Pavarësisht kësaj, burime pranë superstarit argjentinas kanë hedhur idene se është ende herët që sulmuesi të vendosë për të ardhmen e tij. Disa prej këtyre zërave thonë se Messi do të presë përfundimin e Kupës së Botës, e cila do të luhet në fund të këtij viti. Më pas lojtari do të marrë kohën e tij për të analizuar më mirë të ardhmen dhe opsionet që ka në tavolinë.
Gjatë vitit të parë në Paris, ish-ylli i Barcelonës u përball me shumë vështirësi. Përshtatja, dëmtimet dhe Covid-19 e ndaluan atë të jepte më të mirën në Parc des Princes. Kjo bëri që argjentinasi të luante vetëm 10 ndeshje rradhazi me parizienët, diçka e padëgjuar për të gjatë kohës së qëndrimit tek Barcelona.
Përveç talentit të jashtëzakonshëm, ekziston dhe një arsye tjetër se përse PSG kërkon të rinovojë kontratën me “pleshtin”. Messi është një aset mjaft i çmuar dhe në nivelin financiar! Klubi parizien ka përfituar shifra të jashtëzakonshme nga marketingu dhe të drejtat e imazhit të futbollistit argjentinas. Sezoni që lamë pas ishte më fitimprurësi për presidentin e PSG, Nasser al Khelaifi. Kjo lidhet dhe me brand-et e mëdha që Messi solli me vete në Paris, mes tyre: Dior, Volt, Autohero, GOAT etj.
