Ylli i Manchester City, Raheem Sterling, është objektivi më i ri i Milan për merkaton e verës. Momentalisht klubi italian është në negociata me grupin nga Bahreini, Investcorp, që interesohet për blerjen e aksioneve të skuadrës. Nëse marrëveshja zyrtarizohet kjo mund të hapë një derë me mundësi të pafundme për Milan, që mund të vijë me një ofertë zyrtare për shërbimet e Sterlling.
Sulmuesi i kombëtares angleze ka një kontratë aktive deri në vitin 2023 me Manchester City, Kjo do të thotë se klubi anglez duhet të shpejtojë për t’i ofruar Sterling një rinovim kontrate, ose të vendosë përfundimisht për të shitur kartonin e tij. Në të kundërt City rrezikon të humbasë futbollistin me kosto zero vitin e ardhshëm. 27 vjeçari ka qënë një titullar i rregullt këtë sezon në Etihad, teksa ka shënuar 14 gola si dhe 7 asiste në 40 paraqitje gjithsej.
Sipas Gazzetta dello Sport nëse Milan merret në zotërim nga pronarët e rinj, italianët do të kenë mundësinë të targetojnë lojtarë më elitarë, për shkak të mundësive më të mira financiare. Vet Sterling nuk e ka përjashtuar mundësinë e një transferimi në Itali megjithëse lojtari ende nuk ka bërë të ditur qëndrimin e tij.
Në të njejtën kohë, Milan është i interesuar dhe në shërbimet e Marco Asensio dhe Isco të Real Madrid. Të dy spanjollët janë të prirur të largohen nga Santiago Bernabeu duke qënë se nuk kanë gjetur hapësira në ekipin e trajnerit Ancelotti. Sebastien Haller i Ajax dhe Christopher Nkunku i RB Leipzig janë gjithashtu objektiva të kuqezinjëve. Sipas mediave italiane, këta të fundit janë në faza të avancuara të bisedimeve me sulmuesin e Liverpool, Divock Origi, dhe mbrojtësin e Lille, Sven Botman.
Milan ka fituar 18 herë titullin kampion në Serie A, por trofeu i fundit i kuqezinjëve në këtë kompeticion daton në vitin 2011.
