Real Madrid ka konfirmuar zyrtarisht afrimin e mesfushorit francez Aurelien Tchouameni, nga skuadra e Monaco. 22 vjeçari ishte një nga figurat më premtuese në Europë gjatë sezonit të kaluar. Kjo është arsyeja se spanjollët kanë pranuar të paguajnë rreth 100 milionë euro për shërbimet e lojtarit. Shifra ekzakte e operacionit ende nuk është bërë zyrtare.
Tchouameni do të firmosë një kontratë 6 vjeçare me klubin, deri në vitin 2028. Ai pritet t’i nënshtrohet ekzaminimeve mjekësore ditën e martë. Galaktikët kanë arritur kështu të sigurojnë një nga talentet më në zë të vitit të fundit, duke mposhtur PSG, Liverpool dhe Manchester United, që gjithashtu ishin në kërkim të kartonit të tij. Në një deklaratë për mediat, klubi madrilen bëri me dije:
“Të martën e ardhshme, në 14 qershor 12:00 do të zhvillohet ceremonia e prezantimit të Aurélien Tchouaméni, pas ekzaminimeve mjekësore. Më pas Aurélien Tchouaméni do të shfaqet para mediave.”
Tchouameni ishte pjesë mjaft e rëndësishme e Monaco sezonin që lamë pas, duke kontribuar me 3 gola dhe 2 asiste. Paraqitjet e mira me klubin e tij i dhanë dhe shansin e përfaqësimit në kombëtaren franceze. Aventura e tij ndërkombëtare po shkon mjaft mirë, teksa Tchouameni është kthyer në një nga lojtarët e preferuar të Didier Deschamps, duke u aktivizuar si titullar.
Francezi është një lojtar mjaft kreativ, që mund të aktivizohet në rolin e mesfushorit difensiv, por dhe si një mesfushor klasik qëndre. Kjo do të thotë se Tchouameni mund të zëvëndësojë Casemiron në pozicionin e tij, por dhe të ofrojë suport për pjesën tjetër të mesfushës.
Lojtari është afrimi i dytë i Real Madrid këtë verë, pas Antonio Rudiger të Chelsea. Tashmë pritet që spanjollët të fillojnë dhe largimet, për të krijuar më shumë hapësira në skuadër. Mes emrave më të përfolur për t’u larguar janë: Dani Ceballos, Luka Jovic dhe Mariano Diaz.