Drejtuesit e Real Madrid kanë nisur të mendojnë për një zëvëndësues afatgjatë në Santiago Bernabeu, për Karim Benzema. Sulmuesi 35 vjeçar është në fund të karrierës së tij dhe pavarësisht formës spektakolare në sezonet e fundit, Real Madrid duhet të mendojë për të ardhmen. Sidomos duke marrë parasysh faktin se trajneri Carlo Ancelotti ka opsione të kufizuara në qendër të sulmit.
Tekniku italian është mbështetur tek braziliani Rodrygo Goes gjatë kohës që Karim Benzema ka qënë i dëmtuar. Gjithsesi, Goes nuk është një sulmues tipik qëndror, dhe galaktikët kanë nevojë për më shumë siguri. Por cilët janë zëvëndësuesit potencialë të Karim Benzema? Drejtuesit e klubit madrilen mendohet se po ndjekin dy pista kryesore, bëhet fjalë për serbin Vlahovic të Juventus, si dhe Richarlison i Tottenham.
Vlahovic ende nuk është përshtatur si duhet tek Juventus, që po kalon një sezon të vështirë këtë vit në Serie A. “Zonja e Vjetër” u dënua me heqjen e 15 pikëve në renditje nga autoritetet italiane të futbollit dhe sipas të gjitha gjasave do ta ketë mjaft të vështirë kualifikimin në Champions League sezonin e ardhshëm. Ky zhvillim ka qënë mjaft zhgënjyes për Vlahovic, i cili në të njejtën kohë mendohet se është adhurues i Real Madrid, gjë që mund të ndihmojë në transferimin e tij në Spanjë.
Richarlison nga ana tjetër është një objektiv më i komplikuar, teksa problemi kryesor mbetet çmimi i kartonit të lojtarit. Tottenham pagoi plot 58 milionë euro verën e kaluar për shërbimet e tij, dhe londinezët nuk do të kërkojnë më pak se kjo shifër për brazilianin. Drejtuesit e Real Madrid adhurojnë të dy lojtarët, por gjithashtu janë duke eksploruar mundësi të tjera për të pasur sa më shumë alternativa.
Kujtojmë se Benzema është drejt finalizimit të kontratës me madrilenët deri në vitin 2024, ndërkohë që i vetmi qendër-sulmues tjetër në ekip është Mariano Diaz, i cili pritet të largohet nga Real në verë.