Antonio Rudiger ka vendosur të largohet nga Chelsea në fund të këtij sezoni. Lajmi është bërë i ditur nga trajneri Thomas Tuchel, teksa mediat angleze kanë raportuar se mbrojtësi do t’i bashkohet Real Madrid në sezonin e ardhshëm. Kujtojmë se Rudiger do të largohet me kosto zero nga blutë e Londrës, duke qënë se kontrata e tij skadon në fund të sezonit.
Ylli i kombëtares gjermane ka arritur një marrëveshje me galaktikët dhe mendohet se do të firmosë një kontratë 4 vjeçare me Real Madrid. Në bazë të kësaj marrëveshjeje, Rudiger do të përfitojë gjithsej £230,000 në javë, shifër kjo më e lartë se propozimi i fundit për rinovim kontrate i Chelsea. Sipas Sportsmail, Rudiger ka refuzuar oferta nga klube të tjera europiane, mes tyre Barcelona, PSG dhe Juventus, për të firmosur me Real.
Drejtuesit madrilenë kanë kohë që monitorojnë lojtarin, që prej ditëve kur ai aktivizohej me Stuttgart. Spanjollët bënë ofertën e tyre të parë zyrtare për Rudiger në janar, por lojtari vendosi të qëndronte deri në fund të sezonit në Stamford Bridge.
Ndërkohë trajneri Tuchel ka komentuar mbi largimin e Rudiger, duke theksuar se Chelsea do ta ketë të vështirë të gjejë një zëvëndësues në nivelin e tij, edhe në qoftë se sanksionet ndaj klubit hiqen. Tekniku gjerman tha:
“Do të jetë shumë e vështirë pasi Toni ka shumë personalitet. Ai është një lider dhe u heq të tjerëve frikën. Do të na mungojë shumë. Do të jetë sfiduese, por pavarësisht rolit të tij dhe faktit se e dua shumë, Chelsea do të ketë jetë dhe pa Toni Rudiger. Do të gjejmë një zgjidhje.”
Ndërkohë trajneri Tuchel komentoi dhe mbi sanksionet e vendosura ndaj klubit, duke dhënë mesazhin se fansat duhet të tregohen të duruar:
“Nuk mund të tërheqësh barin që të rritet më shpejt. Duhet të përballemi me realitetin dhe për momentin sanksionet janë ende në fuqi. Situata është ende e paqartë për sezonin e ardhshëm.”
