Trajneri i Barcelonës, Xavi Hernandez, është i “fiksuar” që të sjellë sulmuesin e Liverpool, Mohamed Salah në Camp Nou sezonin e ardhshëm, teksa telenovela e rinovimit me “The Reds” po vazhdon ende në Anfield. Salah po i afrohet vitit të fundit të kontratës së tij, dhe mund të largohet nga klubi për çmim të ulët, nëse nuk bie dakord me kushtet e Liverpool përsa i përket kontratës së re.
Shumë klube janë pas shërbimeve të Salah, pasi egjiptiani ka shënuar tashmë 20 gola për Liverpool në Premier League këtë sezon. “The Reds” ende po luftojnë në të gjitha kompeticionet dhe një pjesë e madhe e suksesit që ekipi i Klopp ka arritur, është kontribut direkt i numrit 11.
Liverpool tashmë duhet të bëjë një zgjedhje, ose t’i dorëzohet dëshirave të Salah dhe t’i ofrojë egjiptianit atë çfarë ai kërkon, ose të shesë kartonin e lojtarit për një çmim të reduktuar në verë. Dy janë skenarët që drejtuesit e Liverpool duhet të shmangin me patjetër: Largimin e sumuesit me kosto zero si dhe rrëmbimin e tij nga një rival i mundshëm në Premier League.
Sipas prestigjozes El Mundo Deportivo, Barcelona e ka bërë Salah një objektiv kryesor, pasi egjiptiani është një alternativë më e lirë krahasuar me sulmuesin e Dortmund, Erling Haaland. Norvegjezi kërkohet me ngulm nga presidenti i klubit Joan Laporta, por shuma totale e një marrëveshjeje do të kapte shifrën e 300 milionë paundëve, duke llogarituar pagën e lojtarit. Kjo nxjerr automatikisht Barcelonën nga gara për kartonin e Haaland.
Pas largimit të Leo Messit drejt Paris Saint Germain në fillim të sezonit, Barcelona është në kërkim të një xhevahiri për të mbushur boshllëkun e lënë nga superstari argjentinas, dhe menaxheri Xavi shpreson se ky mund të jetë Mohamed Salah.
