Mohamed Salah është shumë pranë nënshkrimit të një kontrate të re me Liverpool, që do ta mbante atë në Anfield deri në fund të karrierës. Lajmin e ka publikuar prestigjozja angleze Mirror, e cila ka bërë me dije se 29 vjeçari është menduar gjatë dhe ka vendosur t’i japë fund telenovelës së rinovimit duke pranuar kushtet e klubit.
Ky është një lajm i shkëlqyer për trajnerin Jurgen Klopp, i cili do të ketë të disponueshëm një nga sulmuesit më të mirë në botë për momentin, dhe në sezonet e ardhshme. Përpara se të binte dakord me drejtuesit e klubit, egjiptiani refuzoi ofertën e fundit të Liverpool, ku në bazë të saj do të fitonte rreth 400,000 paundë në javë.
Kjo gjë frikësoi bordin drejtues të Liverpool, pasi në rast se nuk do të rinovonte, Salah do të ishte një agjent i lirë në verën e vitit të ardhshëm. Në këtë mënyrë, lojtari mund t’i bashkohej çdo klubi në Europë me kosto zero. Dhe kuptohet se ofertat për Salah nuk do të mungonin, me klube si Paris Saint-Germain dhe Barcelona që kanë shprehur prej kohësh interesin e tyre.
Por tani duket se lojtari është i gatshëm të bëjë kompromis me kërkesën e tij fillestare prej 500,000 paundësh në javë, shumë kjo e afërt me atë që fiton Cristiano Ronaldo tek Manchester United.
Salah është nisur nga afeksioni i madh që tifozët e Liverpool kanë ndaj tij dhe mendohet se ka rënë dakord për një rinovim 3 vjeçar, me opsion zgjatjen e kontratës dhe për 1 tjetër vit ekstra. Vet futobollisti nuk e ka vënë asnjëherë në dyshim besnikërinë e tij ndaj “The Reds”, dhe është shprehur vazhdimisht se ndihet shumë i lumtur në Anfield. Megjithatë, ai ka kërkuar që statusi i tij si një nga sulmuesit më të mirë në botë, të përkthehet dhe në pagën që përfiton.