Tottenham ende nuk është dorëzuar nga ndjekja e sulmuesit të Napolit, Victor Osimhen. Londinezët bënë një ofertë zyrtare për lojtarin gjatë merkatos së janarit, por klubi italian refuzoi propozimin. Ndërkohë së fundmi, një burim pranë Tottenham i ka bërë me dije Football Insider se anglezët do të bëjnë një tjetër ofertë për Osimhen, në merkaton e verës. Lojtari vlerësohet në shifrën e 70 milionë paundëve nga Napoli, dhe duket se Tottenham është gati ta paguajë këtë shumë.
Pavarësisht të ardhmes së Harry Kane, drejtuesit e klubit anglez kanë vendosur që të sjellin në skuadër një sulmues të kalibrit të lartë. Antonio Conte luan vazhdimisht me formacionin 3-5-2, duke vendosur së bashku 2 sulmues në linjën e sulmit. Për këtë arsye, italiani kërkon që Kane dhe Son Heung-Min të ndjejnë konkurrencën e një tjetër emri kualitativ.
Osimhen bën padyshim pjesë në këtë kategori. Lojtari ka konsoliduar pozitat e tij në Serie A, ashtu si beri dhe në Ligue 1. Paraqitjet në Europa League gjithashtu kanë qënë mjaft të mira dhe e njejta gjë mund të thuhet dhe për aktivizimet e tij me kombëtaren nigeriane. Lojtari ka shënuar 9 gola në 18 ndeshje në të gjitha kompeticionet këtë sezon. Por duhet cilësuar se Osimhen ka qënë jashtë fushave të blerta për 2 muaj, për shkak të një dëmtimi në nofull.
Dëmtimi, së bashku me Covid 19 e lanë futbollistin jashtë AFCON, një humbje e madhe për kombëtaren nigeriane. Megjithatë, lojtari është rikhyer të luajë me Napolin gjatë 2 ndeshjeve të fundit. Osimhen ka shënuar gjithsej 19 gola dhe 5 asiste në 46 ndeshje me italianët. Ndërsa përsa i përket Nigerisë, sulmuesi ka realizuar 10 gola në 18 takime. Mbetet të shohim nëse Napoli do të dorëzohet përballë një oferte të majme të Tottenham në verë.
